Julien Ebah: Premyer Liqanın ötən mövsümlə müqayisədə zəifləməsi fikri ilə razı deyiləm
"Kəpəz"in hücumçusu Julien Ebah Topaz Premyer Liqasının 13-cü turu çərçivəsində "Neftçi"yə qarşı keçirdikləri oyundan (2:0) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Oyun barədə nə deyə bilərsiniz?
- Bu gün komanda olaraq yaxşı oynadıq. Rəqibimiz də zəif deyildi. Ola bilər ki, indi yaxşı günlərini yaşamırlar. Amma heyətlərində yaxşı ifaçılar var. Bizə qələbə lazım idi. Onu layiqli şəkildə qazandıq.
- "Kəpəz"in də işlərinin yaxşı getdiyini demək olmaz...
- Amma bizdə hər şey o dərəcədə də pis deyil. Komandamız yaxşı futbol oynayır. Sadəcə, hərdən müsbət nəticə qazanmaq mümkün olmur. İtirilmiş xalları kompensasiya etməyimiz lazımdır.
- Oyundakı ilk qol epizodunda siz qapıçı ilə təkbətəki qaçırdınız...
- Həmin epizodda bəxtim gətirmədi. Qol vurmağı, komandama kömək etməyi çox istəyirdim. Çünki bizim üçün vacib oyun idi. İstənilən halda sonradan hesabı aça bildik. İkinci hissədə isə mən də qol vurdum.
- Belə qazonda oynamaq çətin deyil?
- Çox çətindir. Amma bunu problem etməməliyik. Çünki hər iki komanda eyni şərtlər altında oynayırdı.
- Qələbənin davamı gələcək?
- Yaxşı komandamız, futbolçularımız var. Ümid edirəm ki, qələbə qazanmağa davam edəcəyik.
- Azərbaycanda ikinci mövsümünüzü keçirirsiniz. Razısınız ki, TPL-in səviyyəsi ötən illə müqayisədə aşağı düşüb?
- Razı deyiləm. Ötən mövsümdən yeganə fərq klub sayının azalmasıdır. Amma komandalar arasında səviyyə fərqi elə də böyük deyil. Bu da mübarizəni daha da gərgin edir.
