Mahir Şükürov: Bunu hamı kimi, klub rəhbərliyi də yaxşı görür
"Neftçi"nin müdafiəçisi Mahir Şükürov Topaz Premyer Liqasının 13-cü turu çərçivəsində "Kəpəz"ə məğlubiyyətdən (0:2) sonra azerisport.az saytının suallarını cavablandırıb:
- Matçla bağlı fikirləriniz...
- Bu görüşə ciddi hazırlaşmışdıq. Çünki bizə xal lazım idi. Amma qazonun vəziyyəti bizə normal oynamağa imkan vermədi. Bu üzdən də meydanda ancaq vuruşmaq lazım idi. Rəqib ələ düşən şanslarından yaxşı yararlandı, biz isə yox. Futbol da elə bir oyundur ki, kim şanslarından daha yaxşı yararlanırsa, o da qalib gəlir.
- Siz meydanda vuruşmağın lazım olduğunu qeyd etdiniz. Amma sizdən başqa vuruşan yox idi...
- Kənardan daha yaxşı görünür. Əlimdən gələni etməyə çalışdım. Kimin necə oynadığını isə baş məşqçi və jurnalistlər deyə bilər.
- "Neftçi"nin vəziyyəti barədə nə düşünürsünüz?
- Cansıxıcı vəziyyətdir. "Neftçi" heç vaxt bu qədər qol buraxmamışdı. Mən təkbaşına nə edə bilərəm ki?
- Qışa qədər gözləmək qalır...
- Bizim həm çempionatda, həm də kubokda bir oyunumuz qalır. AZAL-la doğma meydanda qarşılaşacağıq. Qış fasiləsinə normal yollanmaq lazımdır.
- Qışda güclənməyə çox ehtiyac var?
- Əlbəttə, başqa cür mümkün deyil. Bunu hamı görür, eləcə də klub rəhbərliyi.
