Nidal Ferhadoviç: İndiki Qarabağ mən oynadığım komanda deyil
"Qarabağ"ın sabiq hücumçusu Nidal Ferhadoviçin azerisport.az saytına müsahibəsi
- Ağdam klubunda keçirdiyiniz günlər yadınızdadır?
- Azərbaycana gələnədək çoxlu klubda oynamışdım. Hətta Almaniya "Karlsrue"sində də. Amma "Qarabağ" barədə yaxşı xatirələrim var. Mənim üçün doğma klubdur. Artim Şakiri, Zaur Ramazanov kimi futbolçularla birgə oynamışam.
- Ağdam klubu həmin dövrlə müqayisədə çox dəyişib, komanda indi yeni səviyyəyə qalxıb...
- Onların çıxışını izləyirəm. "Slovan"la səfər oyunundakı məğlubiyyəti (0:3) məni məyus etdi. Bunu heç kim gözləmirdi. Amma bu klubun çox böyük işlər gördüyü göz önündədir. Böyük uğura nail olublar. Bu, artıq mən oynadığım komanda deyil.
- Onların Avroliqanın pley-offuna yüksəlməsi mümkündür?
- İtaliya "Fiorentina"sına evdə qalib gələ bilərlər. Hər şey öz əllərindədir. Azərbaycan futbolu son illərdə böyük inkişafa nail olub. Ardıcıl ikinci mövsüm Avroliqanın qrup mərhələsində iki klubla təmsil olunmaq təsadüfi deyil.
- Amma nəzərə almaq lazımdır ki, Ağdam klubu bu rəqibinə səfərdə 1:5 hesabıyla uduzmuşdu...
- Əlbəttə, italyanlara qalib gəlmək asan olmayacaq. Amma Qurban Qurbanov güclü komanda yaradıb və onlar istənilən rəqiblə bərabər səviyyədə oynamağa qadirdirlər. Bu oyunu televizordan izləyəcəyəm. Maraqlı qarşılaşma olacaq.
- İndiki heyətdən kim daha çox xoşunuza gəlir?
- İbrahim Şehiç əla qapıçıdır. Maksim Medvedevlə Qara Qarayev də xoşuma gəlir. Bu, ola bilər ki, həm də onları çoxdan tanımağımdan irəli gəlir. Mən orada oynayanda onlar hələ gənc idilər. Onlara görə şadam.
- Futbol karyeranızı davam etdirirsiniz?
- Xeyr, artıq futbol oynamıram. Çoxdan karyeramı başa vurmuşam. Amma hərdən dostlarla birgə meydana çıxırıq. Sarayevoda yaşayıram. İndi məni futbolla heç nə bağlamır.
- Elə isə, necə dolanırsınız?
- Futbol həyatda yeganə pul qazanmaq yeri deyil. Ailə biznesimiz var. Şikayətim yoxdur.
