“Qarabağa böyük hesabla qalib gəlməyimizi az adam gözləyirdi”

Çexiyanın "Slovan" klubunun yarımmüdafiəçisi Andrey Karafiat Avropa Liqasının qrup mərhələsi çərçivəsində "Qarabağ"a qarşı keçirdikləri oyundan danışıb. Azerisport.az xəbər verir ki, o, 3:0 hesablı qələbə qazandıqları matçla bağlı öncə bunları söyləyib:

"Yablonets"lə uğursuz çempionat oyunundan sonra oturduq və bəzi məsələlərlə bağlı söhbət etdik. "Qarabağ"la oyunda isə göstərdik ki, uğur qazana bilərik. Komanda meydanda səylə çalışdı. İnamlı qələbə qazanmağımız da bunun əyani göstəricisidir".

Onun sözlərinə görə, bu qələbədə onların hesabı erkən açmalarının da rolu böyük olub: "Bizim həm birinci, həm də ikinci hissədə qol vurmaq üçün çoxlu şansımız var idi. Fikrimcə, hesabın belə alınmasında erkən qol vurmağımızın böyük rolu oldu. Uşaqlar matçın qalan dəqiqələrində də eyni istəklə mübarizə apardılar və vacib qələbə qazandıq".

Karafiat qeyd edib ki, onlar qələbə qazanacaqlarına inansalar da, hesab özləri üçün də bir qədər gözlənilməz alınıb: "Aydın məsələdir ki, belə hesabla qalib gələcəyimizi çox az adam gözləyərdi. Minimal fərqlə qalib gələcəyimizə inananlar ola bilərdi. Təbii ki, belə bir nəticəyə imza atmağımız bizim üçün böyük üstünlükdür".

Təcrübəli futbolçu komandasının qrupdan çıxmaq şansları barədə də danışıb: "Qrupdan çıxmaq üçün cüzi də olsa, şans varsa, bundan yararlanmağa çalışacağıq. Amma yekun nəticə həm də "Qarabağ" - "Fiorentina" matçının necə nəticələnməsindən asılı olacaq. İstənilən halda indi bizim daha yaxşı şansımız var, nəinki "Qarabağ"la oyundan öncə. Uğur qazanacağımıza ümidimiz var".