Azər Cabbarov: Qarabağa sonadək dəstək olmaq lazımdır
"Qarabağ"ın sabiq futbolçusu Azər Cabbarov Ağdam klubunun Avropa Liqasının qrup mərhələsi çərçivəsində Çexiya "Slovan"ına məğlubiyyətini (0:3) şərh edib. Azerisport.az saytına açıqlamasında o, bunları söyləyib:
"Oyundan öncə hamı kimi, mən də komandamızın səfərdən uğurlu nəticə ilə dönəcəyinə ümidli idim. Amma hər şey çox fərqli alındı. Nəticəyə görə çox məyusam. Ağdamlıların "Slovan"a qalib gəlməsini, yeni tarix yazmasını çox istərdim. Amma futbolda həmişə istədiyin olmur. Ümid edirəm ki, "Qarabağ" son turda qələbə qazanıb, pley-offa çıxacaq. İstənilən halda bir məğlubiyyətə görə, komandadan üz çevirmək lazım deyil. Əksinə, Ağdam klubuna dəstək olmaq lazımdır. Bakıda "Fiorentina"ya qalib gəlmək realdır. "Qarabağ" istənilən rəqibə qarşı yaxşı oynamağı bacarır. Düzdür, İtaliya klubu ilə oyunda Maksim Medvedev, yaxşı formada olan Migel Madera meydanda olmayacaq. Amma ümid edirəm ki, hər şey komandamız üçün yaxşı başa çatacaq".
