Rikardinyo: Qələbə qazana bilərdik
"Qəbələ"nin müdafiəçisi Rikardinyo Avropa Liqasının qrup mərhələsi çərçivəsində Belçika "Anderlext"inə qarşı oyundan (1:3) sonra jurnalistlərin suallarını cavablandırıb. Azerisport.az sizi həmin açıqlamalarla tanış edir:
- Oyunun belə alınacağını gözləyirdiniz?
- Yaxşı və maraqlı oyun alındı. Yalnız nəticə məyus edir. Bu, əlbəttə, üzücüdür. Amma çox yaxşı komandamız var və bunu bir daha göstərdik. Qələbə də qazana bilərdik.
- İkinci penalti epizodu zamanı nə baş verdi ki, hakim vurduğunuz qolu qeydə almadı?
- Hakim dedi ki, oyunçularınızdan biri vaxtından əvvəl cərimə meydançasına daxil oldu, buna görə də zərbəni təkrarlamaq lazımdır.
- Amma təkrar zərbəniz uğursuz oldu...
- Bəli. Təəssüf ki, top qapıdan aralı keçdi.
- Üç dəfə penalti nöqtəsinə yaxınlaşdınız, hamısında eyni küncü nişan aldınız. Nə əcəb digər küncə zərvə vurmaq istəmədiniz?
- Məşqlər zamanı 11 metrlik zərbələri uğurlu yerinə yetirirdim. Hər iki küncə dəqiq zərbələr endirməyi bacarıram. Oyun zamanı isə həmin küncə zərbə vurmağa qərar verdim. Belə daha uyğun olduğunu düşündüm.
- Penaltini özünüz vurmaq istədiniz, ya məşqçilərin tapşırığı idi?
- Bizim yaxşı penalti yerinə yetirən futbolçularımız var. Sadəcə, həmin gün özümə əmin idim, özümü komfortlu hiss edirdim, buna görə də penaltiləri mən yerinə yetirmək istədim.
- Qarşıda sizi "Qarabağ"la çox vacib çempionat oyunu gözləyir...
- Hər iki komanda yüksək yerlər uğrunda mübarizə aparır. "Qarabağ"ın yaxşı oyunçuları var. Onlar da bizim kimi avrokuboklarda mübarizə aparırlar. Amma biz də artıq Premyer Liqaya qayıtmalıyıq.
