Əfran İsmayılov: Onsuz necə çətin olduğunu Çexiyada gördük

"Qarabağ"ın hücumçusu Əfran İsmayılovun azerisport.az saytına müsahibəsi

- "Slovan"a qarşı səfər oyununuzu necə şərh edə bilərsiniz?
- Hər şey göz önündə idi. Biz çox zəif oynadıq, buna görə də uduzduq.

- Məğlubiyyətinizə nə səbəb oldu?
- Deyə bilmərəm. Bircə onu qeyd edə bilərəm ki, bizim üçün çox vacib oyun idi və meydana qələbə qazanmaq üçün çıxmışdıq. Çox təəssüf ki, belə bir fürstəti əldən verdik. Oyunu analiz etdikdən sonra məğlubiyyətin səbəbini biləcəyik.

- Oyundan öncə az qala hər kəs ən azı bir xalla qayıdacağınızı proqnozlaşdırırdı...
- Bəli, hamı buna əmin idi ki, biz hətta səfərdə qalib gəlib pley-offa çıxacağıq. Amma alınmadı və ən vacib oyunlarımızdan birində çox pis oynadıq.

- Yəqin ki, üçüncü qoldan sonra artıq heç nəyə ümid etmirdiniz...
- Hesab 0:3 olandan sonra oyunda dönüş yaratmaq çətin olur. Amma mənə elə gəlir ki, ələ düşən şanslardan yararlansaydıq, hər şey fərqli ola bilərdi.

- İtaliyada da "Fiorentina" Yunanıstan PAOK-una gözlənilmədən məğlub oldu...
- Mənim üçün gözlənilməz nəticə oldu. Amma təbii ki, futbolda hər şey mümkündür.

- Son turda siz də hədəfə çatmaq üçün İtaliya klubuna qalib gələ biləcəksiniz?
- Tam olaraq həmin oyuna köklənməliyik. Əminəm ki, "Fiorentina" ilə oyun çox maraqlı olacaq. Çünki cütün qalibi pley-offa çıxacaq. Ciddi hazırlaşmalı və italyanlara qalib gəlməliyik.

- Həmin oyunda Maksim Medvedevlə Migel Madera da sizə kömək edə bilməyəcək. Onlarsız çətin olmayacaq?
- Əlbəttə, çətin olacaq. Amma bizdə onları əvəzləyəcək futbolçular var.

- Sizə elə gəlmir ki, "Qarabağ"ın müdafiə xətti Rəşad Sadıqovsuz oynaya bilmir?
- Onun meydanda yeri həm lider, həm də futbolçu kimi görünür. Oyundan sonra Rəşadın özünə də komanda üçün nə dərəcədə önəmli futbolçu olduğunu söylədim. Bunu tək "Qarabağ"a yox, milliyə də aid etmək olar. Ümid edirəm ki, o, tezliklə zədəsini sağaldıb, sıraya dönəcək. Onsuz necə çətin olduğunu Çexiyada gördük.