Filip Ozobiç: Qalib gəlməli olduğumuz oyunu uduzduq
"Qəbələ"nin yarımmüdafiəçisi Filip Ozobiç Avropa Liqasının qrup mərhələsi çərçivəsində Belçika "Anderlext"inə qarşı oyundan (1:3) sonra jurnalistlərin suallarını cavablandırıb. Azerisport.az sizi həmin açıqlamalarla tanış edir:
- Oyun barədə nə deyə bilərsiniz?
- Çox təəssüf ki, uduzduq. Fikrimcə, bu oyunda uduzmalı yox, qələbə qazanmalı idik. Təəssüf ki, belə alındı.
- Rikardinyonun ikinci penalti vuruşu zamanı hakimin qərarı oyuna təsir göstərdi?
- Əlbəttə, hakim qolu ləğv etməsəydi, hesab 2:1 olacaqdı və tam fərqli oyun gedəcəkdi. Belə olan halda qalib də gələ bilərdik.
- Vaxtından öncə cərimə meydançasına qaçan kim idi ki?
- Görmədim. Belə olsa, bütün penalti epizodlarını ləğv etmək lazım gələrdi.
- Artıq Almaniyada "Maynts"a qarşı keçirəcəyiniz səfər oyununda da uğur qazanmağınız çətin görünür. Belə olan halda altı oyuna xal toplamamaq nə dərəcədə üzücü olacaq?
- Biz hələ uduzmamışıq. Bəxt bizdən üz döndərməsə, uğurlu çıxış edə bilərik.
- Tribunalar demək olar ki, boş idi...
- Gələnlər maraqlı futbolun şahidi oldular. Amma təbii ki, bizi dəstəkləməyə az adamın gəlməsi üzücü oldu.
- "Qəbələ" "Qarabağ"la oyuna qədər bərpa ola biləcək?
- Buna borcluyuq. Çünki vacib oyundur və qələbə qazanmaq lazımdır.
- Oyundan öncə Roman Qriqorçuk "Qarabağ"la görüşün "Anderlext"lə oyundan daha vacib olduğunu söyləmişdi...
- Razıyam. Çünki Avroliqada artıq heç bir turnir perspektivimiz qalmayıb. Amma Premyer Liqada hər şey qaydasındadır. Ağdam klubuna qalib gəlsək, daha yaxşı olacaq.
- Baqali Dabo qarşıdakı oyunu buraxacaq...
- Ciddi itkidir. O, yaxşı oyunçudur. Dabosuz çətin olacaq.
