Qəribov: Ola bilər ki, mənim adım bu siyahıya ona görə daxil edilib

"Bakılı"nın futbolçusu Xəzər Qəribov Birinci Divizionda danışılmış oyunlarla bağlı açıqlanan siyahıda yer almasına münasibət bildirib. Azerisport.az saytına açıqlamasında o, bunları söyləyib:

"Hamı bir-birini yaxşı tanıyır, kimin kim olduğunu bilir. Mənim danışılmış oyunlarla heç bir əlaqəm yoxdur. Şübhəsiz ki, bu, mənim üçün gözlənilməz oldu. Hələ də adımın bu siyahıda yer almasına inana bilmirəm. Mən inanclı bir adamam, Allah qarşısında cavab verirəm, belə bir şey edə bilmərəm. Məni elə böyüdüblər ki, belə bir hərəkətə yol verməyim mümkün deyil. Mənim nə AFFA, nə də "Bakılı" rəhbərliyi ilə düşmənçiliyim var. Yəqin ki, kimsə bu barədə AFFA-ya yanlış məlumat verib.

Düzdür, Şakir Qəribov mənim əmimdir. Hamı onun necə adam olduğunu bilir. İstəməzdim ki, mənə görə onun adına xələl gəlsin. Birincisi, o, böyüyümüzdür. Heç kimlə düşmənçiliyimiz yoxdur. Amma hər kəsi sevməyənlər tapılır. Ola bilər ki, kimsə onun acığına mənim adımı bu siyahıya saldırıb. Bunu ən yaxşısı onun özündən soruşun".