Rene Vayler: Bakıda qələbə qazanmaq istəyirik

Belçikanın "Anderlext" klubunun baş məşqçisi Rene Vayler Avropa Liqasının qrup mərhələsi çərçivəsində "Qəbələ"yə qarşı keçirəcəkləri oyun öncəsi mətbuat konfransında jurnalistlərin suallarını cavablandırıb. Azerisport.az sizi həmin açıqlamalarla tanış edir:

- Heyətdə iktilər varmı?
- Bəli, bəzi itkilərimiz var.

- Sizi son uğursuzluqlara görə tənqid edirlər...
- Bunlar əsası olmayan tənqidlərdir. Qarşıdakı oyunlarda da bunu sübut etməyə çalışacağıq.

- Sizinlə oyunçular arasında fikir ayrılığı var?
- Bu barədə oyunçular daha yaxşı cavab verə bilər. Mənim tərəfimdən heç bir problem yoxdur. Hər şey yaxşıdır.

- Sabahkı oyunda şansları necə qiymətləndirərdiniz?
- "Qəbələ" zəif komanda deyil. Sabah da asan olmayacaq. Onlar yaxşı oyunlar keçiriblər.

- "Qəbələ"nin hansı zəif cəhətlərini qeyd edə bilərsiniz?
- Mənim bu barədə danışmağım düzgün olmaz. Onların zəif cəhətləri var və bunları bilirik. Amma onları deməyəcəyəm. Rəqibin güclü cəhətləri barədə də danışmağa ehtiyac olduğunu düşünmürəm.

- "Qəbələ" sabah eksperimental heyətlə oynamağa hazırlaşır. Bu, sizi sevindirir?
- Meydana kimin çıxmasından asılı olmayaraq, bu oyuna çox ciddi hazırlaşmışıq və diqqətli olmalıyıq.

- "Qəbələ" bütün ev oyunlarında qol vurub. Siz bunun qarşısını necə almaq üçün nə düşünmüsünüz?
- Bunu bilirik. Onlar evdə daha yaxşı çıxış edirlər. Amma hədəfimiz qələbə qazanmaqdır.

- Bilirsiz ki, Belçika klubları Bakıda nəinki qələbə qazana, heç qol da vura bilmirlər?
- Mən bu statistikanı nəzərə almıram. Sabah tam fərqli oyun olacaq və statistikanın burda heç bir önəmi yoxdur. Biz qələbə qazanmaq istəyirik. Statistikanı isə zibil qabına atmaq olar.

- Güləriz görünürsünüz. Sabah da oyundan sonra belə güləcəksiniz?
- Qələbə qazansaq, daha çox güləcəyəm. Uduzsaq da, həmişəki kimi olacağam.