Vitali Vernidub: Anderlextlə oyuna müsbət nəticə üçün çıxacağıq
"Qəbələ"nin müdafiəçisi Vitali Vernidubun azerisport.az saytına müsahibəsi
- Heç bir turnir əhəmiyyəti olmasa da, sizi qarşıda Belçika "Anderlext"i ilə çətin oyun gözləyir. Bəs siz bu oyundan nə gözləyirsiniz?
- Hamımız tam ciddi bu oyuna hazırlaşırıq. Böyük məsuliyyət var. Ən yaxşı oyunlarımızdan birini göstərməliyik ki, "Anderlext" kimi güclü kluba qalib gələk. Müsbət nəticəyə köklənmişik.
- Uğursuz gedişata son qoymaq mümkün olacaq?
- Artıq qrupdan çıxmaq şansımız yoxdur. Amma bu barədə heç kim düşünmür. Bu, Avroliqa matçıdır. Hamımız oyuna çox ciddi yanaşırıq. Şansımız qalmasa da, müsbət nəticə üçün meydana çıxmalıyıq. Ən azından onu nəzərə almaq lazımdır ki, hələ qrupda qələbəmiz yoxdur.
- Artıq üçüncü cəhdində pley-offa çıxmağa yaxın olan "Qarabağ"la müqayisədə sizdə nə çatışmır?
- "Qarabağ"la müqayisədə bizdə nə çatışmadığını axtarmağa hazırda ehtiyac olduğunu düşünmürəm. Situasiya belə alınıb. Biz də qarşımıza yüksək hədəflər qoyuruq. Hardasa bəxtimiz gətirmədi, hardasa çatışmazlıqlar, problemlər mane oldu. İstənilən halda önümüzə baxmalı və daha ciddi hədəflər uğrunda çalışmalıyıq.
- Bəlkə klubunuzun büdcəsi buna imkan vermir?
- Mənə bu barədə danışmaq çətindir. Büdcə futbol oynamır. Bizi daha çox oyunlara hazırlığımız maraqlandırır.
- "Qəbələ"nin artıq tam olaraq Premyer Liqaya kökləndiyini söyləmək olar?
- Biz turnirlər arasında heç bir fərq qoymuruq. Sadəcə, hər oyuna qələbə üçün çıxırıq.
- Komandanız bu mövsüm "Qarabağ"la çempionluq uğrunda mübarizə apara biləcək?
- Fikrimcə, bu barədə qış fasiləsindən sonra danışmaq mümkün olacaq. Çünki hazırda hər iki komanda bərabər səviyyədə mübarizə aparır. Ümid edirəm ki, bundan sonrakı turlarda bizdə hər şey alınacaq və daha çox bəxtimiz gətirəcək.
- Bu, cari mövsüm üçün əsas hədəfinizdir?
- Əsas hədəfimiz mövsümün gedişində dəyişmir.
- Qarşıda "Qarabağ"la da oyununuz var. Bu komandaya yenə qalib gələ biləcəksiniz?
- Hazırda "Qarabağ"la oyunu düşünmürük. Çünki öncə "Anderlext"lə oyun ar. Yalnız ondan sonra "Qarabağ" barədə danışmaq olar.
