Qeyri-etik jest və təhqiredici hərəkətə yol verən futbolçulara 3 oyunluq cəza

Bu gün AFFA İntizam Komitəsinin növbəti iclası keçirilib. Azerisport.az xəbər verir ki, aparılan müzakirələrdən sonra Birinci Divizionun 12-ci turunun oyunları ilə bağlı aşağıdakı qərarlar qəbul olunub:

“Turan Tovuz” – “Şahdağ” matçının 2-ci hissəsində “Turan Tovuz”un azarkeşləri tərəfindən meydançaya kənar əşyalar atıldığı üçün klub 160 manat cərimə olunub.

“Şəmkir” – “Səbail” matçının 78-ci dəqiqəsində “Şəmkir”in futbolçusu Şahin Baleljae ikinci sarı vərəqə alaraq meydançadan kənarlaşdırıldığı üçün 1 oyun cəzalanıb, klubu 20 manat cərimə olunub.

MOİK – “Qaradağ Lökbatan” matçının 35-ci dəqiqəsində MOİK-in futbolçusu Məhəmməd Bədəlbəyli qeyri-etik jest göstərdiyinə görə İntizam Komitəsi tərəfindən 3 oyun cəzalanıb. Oyunçuya verilmiş cəzanın 2 oyunu şərti  cəza kimi tətbiq edilir və futbolçuya 6 ay sınaq müddəti verilir. Sınaq müddəti ərzində futbolçu yenidən cəzalanacağı təqdirdə sanksiyanın növbəti hissəsi qüvvəyə minəcək.

“Rəvan” – “Şərurspor” matçında “Rəvan”ın 4 futbolçusu sarı vərəqə ilə cəzalandığı üçün klub 80 manat cərimə olunub.

“Bakılı” – “Energetik” matçında “Energetik”in 4 futbolçusu sarı vərəqə ilə cəzalandığı üçün klub 80 manat cərimə olunub. Oyun başa çatdıqdan sonra “Energetik”in futbolçusu Tural Məmmədov təhqiredici hərəkət etdiyinə görə 3 oyun cəzalanıb, klubu 160 manat cərimə olunub.

“Zaqatala” – “Ağsu” matçının 61-ci dəqiqəsində “Zaqatala”nın futbolçusu Arzuman Nəsibov ikinci sarı vərəqə alaraq meydançadan kənarlaşdırıldığı üçün 1 oyun cəzalanıb, klubu 20 manat cərimə olunub.