Tyaqo Bolinya: UEFA Kubokunu qazanmağı çox istəyirik
Futzal üzrə Azərbaycan yığmasının və "Araz"ın hücumçusu Tyaqo Bolinya UEFA Kubokunun elit raundunun startı ərəfəsində azerisport.az saytının suallarını cavablandırıb:
- Xorvatiya "Nasional"ı, Almaniya "Hamburq"u və Rusiya "Qazprom Yuqra"sı ilə oyunlara necə hazırlaşmısınız?
- Yaxşı. Artıq tam hazır olduğumuzu demək olar. Fikrimcə, Xorvatiyada hər şey bizim üçün uğurlu alınacaq.
- Xüsusi hazırlıq keçmisiniz, ya başqa nəyəsə arxayın olaraq belə inamlı danışırsınız?
- Xeyr, sadəcə, yaxşı komandamız var. Kolumbiyadakı dünya çempionatında da özümüzü yaxşı tərəfdən göstərə bildik. Amma çətin qrupa düşdüyümüzü dərk edirik. "Hamburq"la "Nasional"ın nə qədər güclü olduğunu deyə bilmərəm, amma "Qazprom Yuqra" çox ciddi rəqibdir.
- Deməli, əsas rəqib Rusiya çempionu olacaq?
- Bu komanda həm də UEFA Kubokunun son qalibidir. Bir müddət öncə Rusiya çempionatında "Dinamo" üzərində iki qələbə qazandılar. Şübhəsiz ki, bu komanda qrupun favoritidir. Amma biz öncə "Nasional"la oynamalıyıq. İlk oyunda meydan sahiblərini məğlub etməliyik. Baxmayaraq ki, buna nail olmaq çox çətin olacaq.
- Xorvatlara qalib gələ bilməsəz, qrup birincisi olmaq arzularınızın üzərindən xətt çəkməli olacaqsınız...
- Elə buna görə də start matçımızı qrupun ən vacib oyunlarından biri saymaq olar. Həm də ilk oyunlar həmişə çətin olur. Yalnız "Qazprom Yuqra" barədə düşünsək, heç nəyə nail ola bilmərik.
- Qrupdan çıxa bilməsəniz, necə olacaq?
- Bu artıq rəhbərliyə ünvanlanacaq sualdır. "Araz" pis oynayıb, qrupdan çıxmaya bilər. Eyni zamanda yaxşı oynadığımız halda da buna nail olmaya bilərik. Bunlar fərqli məsələlərdir. Nəyin necə olacağını indidən demək çətindir. Amma hazırda şanslarımız heç də pis deyil. Çünki güclü komandayıq.
- "Araz" UEFA Kubokunda iki dəfə bürünc medal qazanıb. Bu dəfə rəhbərlik qarşınıza hansı hədəfi qoyub?
- Öncə elit raundu uğurlu nəticə ilə başa vurmalıyıq. Dördlər finalına çıxandan sonra orada uğur qazanmaq barədə düşünmək olar. Əlbəttə, hər birimiz UEFA Kubokunu qazanmağı çox istəyirik.
- Siz özünüz necə formadasız?
- Əla! Həm fiziki, həm də oyun baxımından. 29 yaşım var və yaxşı formadayam. DÇ-dəkindən daha yaxşı oynamaq istəyirəm. "Araz" üçün hər şeyin ən yaxşısını etməyə çalışacağam.
