Aqil Məmmədov: AZAL-dakı taleyim baş məşqçi ilə söhbətimdən asılı olacaq
AZAL-ın qapıçısı Aqil Məmmədovun azerisport.az saytına müsahibəsi
- Ötən gün "İnter"ə 0:3 hesablı məğlubiyyətdən sonra baş məşqçi Tərlan Əhmədov bildirdi ki, siz yayda transfer etdikləri futbolçular arasında etimadı doğruldan yeganə futbolçusuz...
- Baş məşqçidən belə sözlər eşitmək xoşdur. Daha çox çalışmaq və onun sözlərini təsdiqləmək istəyirəm.
- Bəs digər futbolçularınıza nə olub, niyə AZAL sonuncu pillədə gedir?
- Hər şeyin o dərəcədə pis olduğunu deməzdim. Komandada xeyli gənc futbolçu var. Həm də çempionat bizim üçün daha da çətinləşib.
- Ona görə ki, elitada sizdən zəif komanda qalmayıb?
- Dediyim kimi, komandada təcrübəli futbolçular elə də çox deyil. Kömək etmək istəsək də, hələlik, alınmır.
- Bəs ayına 500-600 manat alan futbolçudan nə gözləmək olar ki?
- İndi 200 000 və ya 300 000 manat alan futbolçular da vaxtilə 100 dollara oynayıblar. Ona görə də futbolçularımız indi aldıqlarını düşünməməlidirlər. Hər kəs öz oyunu ilə daha artığına layiq olduğunu isbatlamalıdı.
- Onlar bunu isbatlayana kimi AZAL Birinci Diviziona yuvarlana bilər...
- Biz sonuncu olmayacağıq. "Neftçi"dən cəmi 5 xal geri qalırıq. Onlarla daha üç oyunumuz var. Hər şey ola bilər.
- Deməli, yaxşı günlərini yaşamayan "Neftçi"nin sonuncu olacağına da inanırsınız?
- Hazırda onlarda vəziyyətin nə yerdə olduğunu bilmirəm. Amma "Neftçi"ni turnir cədvəlində keçməyimizi istəyirəm. Bizim bunun üçün yetərli gücümüz və imkanımız var.
- Prinsipə görə?
- Xeyr. Heç bir prinsipdən söhbət getmir. Çünki vaxtilə orada oynamışam, pul qazanmışam. Sadəcə, indiki komandamın sonuncu olmamasını istəyirəm.
- Gələcək üçün hansı planlarınız var?
- Bunu Tərlan Əhmədovla müzakirə edəcəyəm. Vaxtilə az pul görməmişəm. Ona görə də pul dalınca qaçmıram. Əks halda heç AZAL-a gəlməzdim. Amma ailəni də saxlamaq lazımdır. Ona görə də AZAL-dakı gələcəyim baş məşqçi ilə söhbətimizdən asılıdır.
