Tural Axundov: Kəpəzdə həm əvvəlki istək yoxdur, həm də bəxtimiz gətirmir
"Kəpəz"in kapitanı Tural Axundov Topaz Premyer Liqasının 12-ci turu çərçivəsində "Qarabağ"a qarşı keçirdikləri oyundan (0:1) sonra azerisport.az saytının da suallarını cavablandırıb.
- Oyun barədə nə deyə bilərsiniz?
- Birinci hissədə oyunumuz alınmadı. Fasilədən sonra daha yaxşı çıxış etdik, bir neçə qol epizodu yaratdıq. Ölkənin ən yaxşı komandasına uduzduq.
- "Kəpəz" "Qarabağ"la səfər oyunlarında elə oynayır ki, sanki ilk dəqiqələrdən uduzur...
- Belə deməzdim. Sadəcə, komanda hələ tam formada deyil. Hər oyuna fərqli heyətlərlə çıxırıq. Buna görə də belə çoxlu səhvlər olur. Bunları aradan qaldırmaq lazımdır.
- Son dövrlər komandanız tez-tez oyunu azlıqda başa vurur. İntizam çatışmazlığı var?
- Məsələ intizamda deyil. Oyunçularımız birbaşa qırmızı vərəqə almırlar. Adətən, ikinci sarı vərəqə almaqla qırmızı vərəqə göstərilir.
- Az qala hər oyunda xal itirirsiniz. Bu, komandanızın avrokuboklara vəsiqə qazanmasına nə dərəcədə təsir edə bilər?
- Qələbə qazanmaq üçün əlimizdən gələni edirik. Buna baxmayaraq, avrokuboklara vəsiqə qazanmaq əsas hədəfimizdir.
- İstənilən halda "Kəpəz" ötən mövsüm daha inamlı çıxış edirdi...
- Razıyam. İndiki heyətimiz də güclüdür. Lakin sanki ötən mövsümdəki istək yoxdur.
- Kapitan olaraq vəziyyəti düzəltmək üçün nə düşünürsünüz?
- Komanda ilə danışıram. Digər tərəfdən bəxtimiz də gətirmir. Təkcə elə "Qarabağ"la oyunda top iki dəfə dirəkdən qayıtdı.
- Premyer Liqada klub sayının azalması xal qazanmağınıza təsir edir?
- Təbii ki, ötən mövsüm bu baxımdan işimiz yaxşı idi. İndi eyni rəqiblərə qarşı tez-tez oynamaq psixoloji cəhətdən də çətindir.
