Qurban Qurbanov: Ondan daha yaxşı oyun gözləyirəm
"Qarabağ"ın baş məşqçisi Qurban Qurbanov Azərbaycan Premyer Liqasının 12-ci turu çərçivəsində "Kəpəz"ə qarşı keçirdikləri oyunu şərh edib. Azerisport.az xəbər verir ki, Ağdam klubunun çalışdırıcısı 1:0 hesabıyla bitən qarşılaşmadan sonra bunları söyləyib:
"Çətin oyun oldu. Oyundan narazıyam. Amma bunu da başa düşmək olar. Çünki komanda 15 günə yaxın idi ki, birgə deyildi. Bu da təbii ki, oyun ritminin pozulmasına səbəb olur. "Kəpəz" yaxşı oyun göstərdi. Bizim futbolçulara özlərini göstərməyə imkan vermədilər. Bədavi Hüseynov zədə alıb. Hələ onun Çexiya "Slovan"ına qarşı oynayıb-oynamayacağını bilmirik. O da oynamasa, müdafiədə elə də geniş seçim imkanımız qalmayacaq. Bu gün qol vuran Dino Ndlovuya gəlincə, üzərində çox çalışır. Ondan daha yaxşı oyun gözləyirəm". (СВС)
