Serjinyo: Qarabağın pley-offa çıxmaq üçün yaxşı şansı var
"Kəpəz"in yarımmüdafiəçisi Serjinyo Topaz Premyer Liqasının 12-ci turu çərçivəsində "Qarabağ"a qarşı keçirəcəkləri oyun öncəsi azerisport.az saytının suallarını cavablandırıb.
- "Qarabağ"la oyuna hazırsınız?
- Aydın məsələdir ki, belə bir kluba qarşı oyun bizim üçün çox çətin olacaq. "Qarabağ" çox güclü komandadır. Amma buna baxmayaraq, biz bir xal üçün oynayacağıq.
- Birinci dövrədə bu rəqiblə bərabərə qalmışdınız - 1:1.
- Onlar Gəncədə çox yaxşı oynamışdılar. Amma bu dəfə Bakıda oynayacağıq. Bu dəfə xal qazanıb-qazanmayacağımızı isə zaman göstərəcək.
- Sizdən fərqli, rəqib komandanın futbolçularının daha yorğun olduğunu demək olar. Bu, sizin üçün üstünlükdür?
- Hazırda bu, o qədər də önəmli deyil. Bu amil oyuna heç bir təsir göstərməyəcək.
- Bəs rəqibin heyətində kapitan Rəşad Sadıqovun yoxluğu necə?
- Bunu bizim üçün üstünlük saymaq olar. O, "Qarabağ"ın lideridir. Onun yoxluğu bizim işimizi asanlaşdıra, kömək edə bilər.
- "Qarabağ"ın Avropa Liqasında qrupdan çıxmaq şansları barədə nə düşünürsünüz?
- Onların oyunu mənim ürəyimcədir. Avroliqadakı hər matçlarını izləyirəm. Ağdamlıların pley-offa çıxmaq üçün çox yaxşı şansı var. Artıq hər şey özlərindən asılıdır. Fikrimcə, bu şansdan yararlana biləcəklər.
- "Qarabağ"dan sonra sizi "Neftçi", "Qəbələ" və "İnter"lə oyunlar gözləyir...
- Ciddi qrafikdir. Amma biz xal ehtiyatımızı yaxşılaşdırmaq, uğur qazanmaq istəyirik. Bu matçlarda bizə nə qədər çətin olsa da, buna nail olmağa çalışacağıq. Hər biri çox güclü komandadır. Buna baxmayaraq, onlarla görüşə uğur qazanmaq üçün çıxacağıq.
- Azərbaycanda çıxış edən portuqaliyalı legioner olaraq ölkənizdə çıxış edən həmyerlilərimiz - Kamran Ağayev və Emin Mahmudovun "Boavişta"dakı karyerasını necə qiymətləndirə bilərsiniz?
- Bu komandada iki azərbaycanlı futoblçunun çıxış etdiyini bilirəm. Amma düzünü desəm, oyunlarına baxmamışam. Bircə onu bilirəm ki, "Boavişta" yaxşı klubdur. Yaxşı şəraiti var. Bu komandada hər bir futbolçu inkişafa nail ola bilər.
