Fikrət Hüseynov: Bütün klublar bununla razılaşdılar
AZAL-ın vitse-prezidenti Fikrət Hüseynov bu gün baş tutan AFFA Klublar Komitəsinin növbəti iclasından sonra jurnalistlərin suallarını cavablandırıb. Azerisport.az xəbər verir ki, o, öncə müzakirə etdikləri məsələlər barədə məlumat verib:
- İclasın birinci hissəsi uşaq futboluna həsr olunmuşdu. Bu sahədə neqativ hallar çoxdur və onların qısa zamanda aradan qaldırılacağına ümid edirik.
Əsas məsələlərdən biri meydançaların vəziyyəti ilə bağlı idi. "Qarabağ"la "Qəbələ" süni örtüklü meydançaların ləğv olunmasını təklif etdi. Həmçinin Gəncə şəhər stadionunun qazonunu yaxşılaşdırmaq lazımdır. Belə meydançalarda oynamaq çox çətindir. Bu problem növbəti mövsümə kimi yoluna qoyulmalıdır. Məsələ ilə bağlı İcraiyyə Komitəsinə də müraciət edəcəyik. AFFA klubları öz infrastrukturunu daha da yaxşılaşdırmağa məcbur etməlidir. Premyer Liqada çıxış edən klubların meydançaları belədirsə, Birinci Divizion klublarının şəraitindən nə danışa bilərik?
İK-ya reqlamentin dəyişdirilməsi ilə də bağlı müraciət edəcəyik. İndiki məqamda elitanı bir klub tərk etməlidir, Birinci Diviziondan isə üç klub yüksək liqaya çıxmalıdır. Biz təklif etdik ki, Birinci Divizionda ilk iki yeri tutan komanda elitaya birbaşa yüksəlsin. Üçüncü olacaq komanda isə Premyer Liqada sonuncu olacaq klubla pley-off oyunlarında qarşılaşsın. Bütün klublar bununla razılaşdılar. Həm də nəzərə almaq lazımdır ki, Divizion klublarının heç də hamısı lisenziyalaşdırma prosesini keçə bilmir. Premyer Liqada çıxış edən klubun isə belə problemi olmur.
- Sonuncu pillədə hazırda AZAL-ın qərarlaşdığını nəzərə alsaq, bunu özünüzə görə təklif etdiniz?
- Bu, AZAL üçün atılan addım deyil. Hazırda sonuncu pillədə olsaq da, iki qələbə ilə zirzəmidən çıxa bilərik.
- Bu mövsüm yenə toplaşmağı nəzərdə tutursunuzmu?
- Dekabrda daha bir toplantımız olacaq. Ola bilsin ki, hətta iki dəfə yığışaq.
- AZAL-ın stadionu da süni örtüklüdür. Bəs siz necə edəcəksiniz?
- İslam Oyunlarının bəzi yarışları bizim stadionda keçiriləcək. Buna görə onsuz da qazonu təbii ot örtüyünə dəyişəcəyik.
- Futbolçularınızın bir neçə aydır maaş almadığı barədə xəbərlər doğrudur?
- Xeyr. Maaşları zamanında ödəyirik. Klub normal idarə olunur. Bundan sonra necə olacağına isə növbəti ilin martında aydınlıq gələcək. Klub rəhbərliyi həmin ay bir araya gəlib, hər şeyi müzakirə edəcək.
