Rauf Əliyev: Bir məğlubiyyətə görə ümidimizi itirməməliyik

Futbol üzrə Azərbaycan yığmasının və "İnter"in hücumçusu Rauf Əliyevin azerisport.az saytına müsahibəsi

- Millimizin Şimali İrlandiyaya qarşı səfər oyununa baxdınız?
- Bəli. Komandamızın bu oyunda uğur qazanmasını çox istəyirdim. Əfsuslar olsun ki, alınmadı.

- Sizcə, komandamız niyə Belfastda 0:4 hesablı məğlubiyyətlə üzləşdi?
- Hamımız şimali irlandiyalıların standart vəziyyətlərdən necə yararlandığını gördük. Bu, onların əsas üstünlüyü idi. Qollardan üçünü məhz belə vurmaları da bundan xəbər verir.

- Artıq yığmamızın bu seçmə mərhələni də uğursuz keçirəcəyini düşünmək olar?
- Bir məğlubiyyətə görə ümidimizi itirməyə dəyməz. Yığmamız ilk üç turda uğurlu çıxış etdi. Ümid edirəm ki, bundan sonrakı oyunlarımızda da uğur qazanacağıq.

- Sizcə, hələ heç nə itirilməyib?
- Qarşıda hələ xeyli oyun var. Yeri gəlmişkən, şimali irlandiyalılar da Bakıya gələcəklər. Həmin matçda uğurlu çıxış edə bilərik.

- Yəqin ki, DÇ-2014-ün seçmə mərhələsi çərçivəsində bu komandaya qarşı keçirdiyiniz səfər oyunu yadınızdadır. Hər halda Belfastda qol vurduğunuz həmin oyunun son saniyələrində qələbəni əldən versəniz də, millimiz xal qazana bilmişdi. Həmin komanda ilə indikini müqayisə edə bilərsiniz?
- Bu dəfə də heyətdə 4 il əvvəl qarşılaşdığımız futbolçuları gördüm. Rəqibimiz heyətini demək olar ki, dəyişməmişdi.

- Millimizin sizin kimi hücumçuya ehtiyacı var idimi? Qarşıdakı oyunlarda sizi meydanda görə biləcəyik?
- Yığmamızın mənə ehtiyacı olub-olmadığını mən deyə bilmərəm. Bu suala başqaları cavab versə, daha yaxşı olar. Amma mən daim yığma üçün vuruşmağa hazıram. Bunun üçün mənə şans verilib-verilməyəcəyini də zaman göstərəcək.