Ömər Paşayev: Bu, nəinki düz deyil, həm də gülməlidir
FİFA referisi adını alan azərbaycanlı hakim Ömər Paşayev bu münasibətlə azerisport.az saytının suallarını cavablandırıb:
- FİFA referisi adını almağınız sizin üçün nə dərəcədə gözlənilməz oldu?
- Son ana qədər mənə FİFA referisi adı veriləcəyinə əmin deyildim. Ötən gün Xaqani Məmmədov zəng etdi və bu xəbəri verdi, təbrik etdi. Buna görə çox şadam.
- Bundan sonrakı hədəf nədir?
- Artıq bundan sonra daha məsuliyyətli olmalıyam. Bu, mənim həyatımda çox böyük çağırışdır. Özümü doğrultmalıyam. Ümid edirəm ki, ölkəmizi layiqincə təmsil edəcəyəm.
- Əliyar Ağayevin beynəlxalq arenadakı uğurlu idarəçiliyi digər hakimlərimizin yolunu açırmı?
- Əlbəttə. Əliyarla Rəhim (Həsənov) nə qədər yaxşı idarəçilik edirsə, bu, digər hakimlərimiz üçün də yaxşıdır. Bu, alacağımız təyinatlara təsirsiz ötüşmür.
- Deməli, digər hakimlərimiz Əliyara azarkeşlik edirlər?
- Təbii ki, hər birimiz ona görə həyəcan keçiririk, səhv etməməsini, yaxşı qiymət almasını arzulayırıq. Son illərdə azərbaycanlı hakimlərə inam artıb. Yaxın gələcəkdə üç azərbaycanlı hakimlər briqadası öz fəaliyyəti ilə ümidləri doğrultsa, istisna deyil ki, FİFA dördüncü briqadamıza da yol açsın.
- Amma sizin bu təyinatınızdan sonra vaxtilə buraxdığınız səhvlərə görə tənqidlər də oldu...
- Tənqidləri oxumamışam. Amma deyənlər olub. Guya ki, mən Xaqani Məmmədovla münasibətlərim yaxşı olduğuna görə FİFA referisi adı almışam.
- Bu, düz deyil?
- Nəinki düz deyil, həm də gülməlidi. FİFA referisi adı almışam. Layiq olmadığım halda buna necə icazə verərdilər? Buna hazır olmasaydım, heç vaxt belə bir təyinat baş verməzdi. Təsəvvür edirsiniz ki, hansısa beynəlxalq oyunda sistematik səhvlər buraxsam, nə olar?
- Siz Orxan Məmmədovu əvəzlədiniz. Təyinatdan sonra o sizə nə dedi?
- Hələ onunla görüşməmişəm. Bu barədə heç nə deyə bilmərəm. Hər kəsin başına gələ bilər.
