Ramaldanov: Müdafiə xətti diqqətli oynasaydı, milli böyük hesabla uduzmazdı
Futbol üzrə Azərbaycan yığmasının sabiq üzvü, Gürcüstanın "Kolxeti" klubunun müdafiəçisi Rasim Ramaldanov millimizin DÇ-2018-in seçmə mərhələsi çərçivəsində Şimali İrlandiyaya məğlubiyyətini şərh edib. Azerisport.az saytına açıqlamasında o, bunları söyləyib:
"Oyuna baxdım. Çox təəssüf ki, belə uduzdular. Halbuki, şans var idi. Məğlubiyyətin səbəblərinə gəlincə, rəqib "ikinci mərtəbə"də çox yaxşı idi. Bizə qarşı böyük istəklə oynadıqları görünürdü. Birinci hissədə biz hücumda heç nə ilə yadda qalmadıq. Meydan sahibləri isə güclü pressinq tətbiq edirdilər və fasiləyə qədər demək olar ki, qələbəni təmin etmişdilər. Şimali İrlandiya yığmasının son illərdə çox dəyişdiyini düşünmürəm. Çünki 2012-ci ildə Belfastda onlara qarşı oynayanda da həmin heyət idi. Bizim yığmamıza gəlincə, o dövrdəkinin və ya indikinin güclü olduğunu deyə bilmərəm. Ola bilsin ki, müdafiədə diqqətli oynasaydıq, hesab belə alınmazdı".
