Qəbələdə 10 qolluq oyun

Milli komandaların oyunları ilə əlaqədar Topaz Premyer Liqasında yaranan fasilə dövründə hazırlıqlarını davam etdirən “Qəbələ” yoxlama oyunu keçirib. Azerisport.az xəbər verir ki, Roman Qriqorçukun yetirmələri klubun əvəzedici komandası ilə qarşılaşıb.

Hər iki komanda görüşü yığmaların heyətinə cəlb olunan futbolçular olmadan keçirib. Əsas komanda Qəbələ şəhər stadionundakı matça aşağıdakı heyətlə başlayıb: Dmitri Bezotosnı, Rikardinyo, Ürfan Abbasov, Voyislav Stankoviç, Vitali Vernidub, Elvin Camalov, Rəşad Sadiqov, Cavid Hüseynov, Rəşad Eyyubov, Filip Ozobiç, Baqali Dabo. Qriqorçuk matçın gedişində  David Petrkeviç, Sadiq Quliyev, Rafael Santos, Teo Uiks, Rövlan Muradov, Fərid Nəbiyev, Asif Məmmədov, Tellur Mütəllimov, Murad Musayev və Petar Franyiçə də şans verib.

Məhsuldar keçən qarşılaşmanın ilk yarısında 6 qol vurulub. Əsas komandanın 5:1 hesabı ilə üstün olduğu hissədə Baqali Dabo 4, Filip Ozobiç 1 dəfə fərqlənib. Əvəzedicilərin ilk yarıdakı qoluna Qədir Bayramlı imza atıb. İkinci hissədə qapılara daha 4 top vurulub. Fasilədən sonra Teo Uiksin 2, Tellur Mütəllimovun 1 qoluna əvəzedicilər Ramil Hasanovla cavab verib – 8:2.

Bu oyundan sonra bir günlük istirahətə buraxılan “qırmızı-qaralar” hazırlıqlarını noyabrın 15-də bərpa edəcək.

Xatırladaq ki, “Qəbələ” növbəti matçını noyabrın 19-da keçirəcək. “Qırmızı-qaralar” Topaz Premyer Liqasının 12-ci turunda “Zirə”ni qəbul edəcək. Bir gün öncə isə klubların əvəzedici heyətləri qarşılaşacaq.