Qurbanov: Boyu iki metrdən çox olan rəqiblə hava mübarizəsində necə qalib gələ bilərik?
Futbol üzrə Azərbaycan yığmasının hücumçusu Ruslan Qurbanov DÇ-2018-in seçmə mərhələsi çərçivəsində Şimali İrlandiyaya qarşı səfər oyunundan (0:4) sonra azerisport.az saytının suallarını cavablandırıb:
- 0:4 hesablı məğlubiyyət sizin üçün nə dərəcədə gözlənilməz alındı?
- Fikrimcə, burada nədənsə danışmaq artıqdır. Rəqib əsas üstünlüyündən - "ikinci mərtəbədə" yaxşı oynamaq bacarığından yaxşı yararlandı. Onlar bu baxımdan bizdən çox güclüdürlər.
- Üç oyunda bir dənə də qol buraxmayan komandanın bir matçda 4 top buraxmasının yeganə səbəbi məhz budur?
- Rəqib komanda standart vəziyyətlərdə çox yaxşı idi. Onların dörd qoldan üçünü məhz belə vəziyyətlərdə vurması da bunu təsdiq edir.
- Bəs onların bu üstünlüklərini bildiyiniz halda niyə daha diqqətli olmadınız?
- Əlbəttə, bütün bunları bilirdik. Onlara standart vəziyyətlərdə şans verməməliydik. Oyundan öncə bu barədə çox danışmışdıq. Amma oyunun gedişində rəqib oyunçuları zərərsizləşdirməyi bacarmadıq. Rəqib oyunçuların boyu iki metrdən çoxdur. Biz onlarla hava mübarizəsində necə üstün ola bilərdik?
- Fasilədən sonra oyunda dönüş yaradacağınızı hiss etdirməyə başlamışdınız. Amma yenə heç nə edə bilmədiniz...
- Qol vurmaq istəyirdik. Bunun üçün şanslarımız da oldu. Məsələn, Dəniz Yılmaz hələ hesab 0:2 olarkən əla qol şansını əldən qaçırdı.
- "Azərbaycan nağılı"nın bitdiyini demək olar?
- Biz cəmi bir oyunu uduzmuşuq. Bunu faciəyə çevirmək lazım deyil. Hesabımızda 7 xal var. Bu dəfə də 3, ən azından 1 xal qazanmaq istəyirdik. Əfsuslar olsun ki, alınmadı.
- Növbəti oyun gələn ilin martında Almaniyaya qarşı olacaq. Onları təəccübləndirə biləcəyik?
- Almaniyaya qarşı yaxşı oynamağa, belə bir rəqibdən təcrübə toplamağa çalışacağıq. Əlbəttə, futbolda hər şey mümkündür. Ancaq öz oyunumuz, nəticələrimiz barədə düşünməli, hər şeyə psixoloji cəhətdən hazır olmalıyıq. İndidən Almaniyaya məğlubiyyəti düşünsək, onda futbol oynamağın mənası olmaz. Pozitiv düşünmək lazımdır.
