Məhəmməd Mirzəbəyov: Ən yaxşı oyunumuzu sərgiləməliyik
Futbol üzrə Azərbaycan yığmasının müdafiəçisi Məhəmməd Mirzəbəyov DÇ-2018-in seçmə mərhələsi çərçivəsində Şimali İrlandiyaya qarşı səfər oyunu öncəsi azerisport.az saytının suallarını cavablandırıb:
- Komandamız Şimali İrlandiya ilə oyun öncəsi özünü necə hiss edir?
- Hər şey yaxşıdır. Ab-hava da yaxşıdır. Qarşıdakı oyuna ciddi hazırlaşırıq. Bizi ağır matç gözləyir.
- Komandamızın səfərə bir neçə gün öncədən yollanması nə ilə bağlı idi?
- Yerli şəraitə daha yaxşı uyğunlaşmaq üçün. Saatla bağlı ciddi fərq var: 4 saat. Buna uyğunlaşmaq lazım idi. Bakı vaxtı ilə gecə yarısı oynayacağıq.
- Komandamızın bu oyundakı şansları barədə nə düşünürsünüz?
- Şans həmişə var. Sadəcə, ondan 100 faiz yararlanmağa çalışmaq lazımdır. Müsbət nəticə qazanıb vəziyyətimizi daha da yaxşılaşdırmalıyıq.
- Şimali İrlandiyanın Norveç və Çexiyadan daha güclü komanda olduğunu demək olar?
- Məncə, bu komandaların hamısı güclü və yaxşı rəqiblərdir. Kimisə fərqləndirmək istəməzdim. Sözügedən komandalarla oyunların heç biri asan keçməyib və qalanları da asan olmayacaq. Müsbət nəticə qazanmaq üçün ən yaxşı oyunumuzu sərgiləməyimiz lazımdır.
- Razısınız ki, britaniyalılar çexlərlə müqayisədə daha kəsərli və güclü hücumlar təşkil edəcəklər? Buna hazırsınız?
- Bəli, bunu başa düşürük. Amma biz də onlara eyni qaydada cavab verməyə çalışacağıq. Ən yaxşı müdafiə hücumdur. Bunu unutmamalıyıq.
- Millinin az qala hər toplanışına yeni futbolçu qoşulur...
- Buna normal baxıram. Əsas odur ki, dəvət alanların hər birinin milliyə faydası toxunsun. Uğur qazanmaq üçün hamımız əlimizdən gələni etməliyik.
- Avropa Liqasının qrup mərhələsindəki uğurlu nəticələrdən sonra "Qarabağ"ın futbolçuları milliyə ruh yüksəkliyi ilə gəliblər. Bəs "Qəbələ"li futbolçularda vəziyyət necədir?
- Əlbəttə, ardıcıl məğlubiyyətlər almağmız üzücüdür. Amma həmin oyunlar geridə qalıb. Önümüzə baxmalı, qarşıdakı oyunları düşünməliyik. İndi yığmadayıq. Deməli, yalnız millinin matçlarından danışmlıyıq.
