Arif Əsədov: Ən azı 1 xalla qayıtmaq üçün Belfastda qol vurmalıyıq

Azərbaycanlı məşqçi Arif Əsədov millimizin DÇ-2018-in seçmə mərhələsi çərçivəsində bu gün Belfastda baş tutacaq Şimali İrlandiyaya qarşı səfər oyunu öncəsi fikirlərini bölüşüb. Azerisport.az saytına açıqlamasında o, bunları söyləyib:

"Millinin bu dəfə açıqlanan start heyətində xeyli futbolçu var ki, öz klubunda ya oynamır, ya da az oynayır. Ən çox sual doğuran Emin Mahmudovun ilk dəqiqələrdən meydana buraxılmasıdır. Çünki o, bu mövsüm "Boavişta"da bir dənə də oyun keçirməyib. Amma öz klubunda oynamayan futbolçunun milli komandaya dəvət olunması, ilk dəqiqələrdən meydana buraxılması ilə ilk dəfə rastlaşmırıq. Görünür, Robert Prosineçki bu futbolçunun hansısa keyfiyyətlərini görüb və ondan yararlanmaq istəyir. Oyuna gəlincə, millimiz üçün çətin olacaq. Rəqiblər artıq bizə fərqli gözlə baxırlar. Heç-heçə edə bilərik. Özü də bu, çox uğurlu nəticə olardı. Qolsuz heç-heçəyə inanmıram. Hesabı birinci açsaq, 1:1 oynaya bilərik. Oradan ən azı 1 xalla qayıtmaq üçün qol vurmaq lazımır. Səfərdə oynaya bilirik. Bunu Belfastda da isbatlamalıyı".