Vüqar Əsgərov qol vurdu, komandası ilk pley-off oyununda bərabərə qaldı
Futbol üzrə Latviya çempionatına vəsiqə uğrunda ilk pley-oyunu keçirilib. Azerisport.az xəbər verir ki, elitaya ikinci vəsiqə uğrunda bu mövsüm 8 komanda arasında 7-ci yeri tutaraq aşağı diviziona düşmək təhlükəli ilə üzləşən "Metta" və aşağı liqanın gümüş medalçısı "Olayne" qarşılaşıb.
Azərbaycanlı futbolçular - Vüqar Əsgərov və Orxan Həsənəliyevin komandası elita təmsilçisini doğma meydanda qəbul edib. "Olayne" ilk görüşdə qələbə qazana bilməyib - 1:1.
Orxanın sonadək ehtiyatda qaldığı qarşılaşmaya start heyətdə başlayan və 90 dəqiqə meydanda olan Vüqar yenə bombardirlik keyfiyyətlərini nümayiş etdirib. Belə ki, bu mövsüm birinci divizionda 40 qolla "Olayne"nin ən məhsuldar futbolçusuna çevrilən millimizin sabiq forvardı 52-ci dəqiqədən məğlub durumda olan komandasının bərabərlik qoluna imza atıb (85-ci dəqiqə).
Tərəflər arasındakı cavab qarşılaşması noyabrın 13-də keçiriləcək. "Olayne" həmin qarşılaşmada müsbət nəticə qazana bilsə, növbəti mövsümdən elitada çıxış edəcək.
