Roman Qriqorçuk 1 oyunluq cəzalanmasından danışdı

"Qəbələ"nin baş məşqçisi Roman Qriqorçuk Topaz Premyer Liqasının 11-ci turu çərçivəsində AZAL-a qarşı oyunda texniki zonadan kənarlaşdırıldığına görə 1 oyunluq cəza almasına münasibət bildirib. Azerisport.az saytına açıqlamasında o, bunları söyləyib:

"Mən bu qərarı heç müzakirə etmirəm. Bütün bəraətlərimə baxmayaraq, etdiyim hərəkətə görə belə bir cəza vermələrinə haqları var. Belə qərarları müzakirəsiz qəbul edirəm. AZAL-ın futbolçusu İlqar Ələkbərovun diskvalifikasiya olunmasına gəlincə, iki oyunluq cəza ağırdır. O, bununla çox şey itirəcək. Ciddi cəzadır. Təbii ki, hansısa futbolçunun cəzalanmasını istəməzdim. Sadəcə, belə şeyləri öncədən düşünüb cəzaya səbəb olacaq hərəkətlərə yol verməmək lazımdır".