Əfran İsmayılov: Millinin uğurlarında əsas pay sahibi Robert Prosineçkidir

"Qarabağ"ın yarımmüdafiəçisi Əfran İsmayılov Topaz Premyer Liqasının 11-ci turu çərçivəsində "Zirə"yə qarşı keçirdikləri oyundan (2:0) sonra jurnalistlərin suallarını cavablandırıb. Azerisport.az xəbər verir ki, o, öncə bunları söyləyib:

- "Zirə" çətin rəqibdir. Çətin olacağını bilirdik. Biz həmişə bu rəqibə qarşı ciddi hazırlaşırıq. Maraqlı oyun alındı. Şadam ki, sonda qələbə qazana bildik. Artıq bu oyunu unutmalı və yığmamızın oyununa hazırlaşmalıyıq. Şimali İrlandiya ilə vacib oyunumuz var.

- "Qəbələ"nin bu turda xal itirməsini gözləyirdiniz?
- Onlardan geri qalırdıq. Bu komandanın xal itirməsi bizim üçün vacib idi. Amma təbii ki, bizim üçün rəqiblərimizin necə oynamasından daha önəmli olan öz çıxışımız, nəticələrimizdir.

- Bu, nəyisə dəyişir?
- Hələ mövsümün sonuna çox var. Çempionluqdan danışmaq tezdir. "Qəbələ" ilə də hələ üç oyunumuz olacaq.

- Bəs Şimali İrlandiya ilə oyundan nə gözləyək?
- Bu seçmə mərhələyə daha yaxşı başlamışıq. Bu nəticələr bizim üçün göstərici deyil. Bu uğurda əss pay sahibi Robert Prosineçkidir. O, komandamızda yeni atmosfer, oyun stili yaradıb. Asan səfər olmayacaq. Amma müsbət nəticə qazanmaq üçün əlimizdən gələni edəcəyik. Bizi minimum heç-heçə qane edəcək.

- Yığmamıza yeni dəvət alan Dəniz Yılmaz barədə nə düşünürsünüz?
- Dəniz bacarıqlı futbolçudur. Əks halda Türkiyə çempionatının liderlər qrupunda qərarlaşan "Bursaspor"un əsas heyətində oynamazdı. Komandamıza kimin gəlməsindən asılı olmayaraq, əsas milliyə faydalı olmaqdır. Ümid edirəm ki, o da yığmamıza qarşıdakı kömək edə biləcək.