Rahid Əmirquliyev: Bu gedişlə çempionluğa son turda aydınlıq gələcək
"Qarabağ"ın yarımmüdafiəçisi Rahid Əmirquliyev Topaz Premyer Liqasının 11-ci turu çərçivəsində "Zirə"yə qarşı keçirdikləri oyundan sonra jurnalistlərin suallarını cavablandırıb. Azerisport.az xəbər verir ki, o, 2:0 hesablı qələbəni belə şərh edib:
- Üç gün əvvəl Avropa Liqasında oyunumuz olmuşdu. Ondan öncə AZAL-la süni örtüklü meydanda oynamışdıq. Bir qədər yorğunluq olduğundan, çətin idi. Buna baxmayaraq, ikinci hissədə öz oyunumuzu tapdıq və iki qol vurub qalib gəldik.
- Dörd tur əvvəl "Qarabağ" "Qəbələ"dən 6 xal geri qalırdı. Amma indi xallarınız bərabərdir. Rəqibə belə tez çatacağınızı gözləyirdiniz?
- Gözləmirdik. Amma digər tərəfdən hər şey aydındır. Bütün oyunlar çətin keçir. Hər komanda xal itirə bilər. Bu gedişlə çempionun taleyinə son tura kimi aydınlıq gəlməyəcək.
- Bu mübarizə elə "Qarabağ"la "Qəbələ" arasında gedəcək?
- "İnter" də mövsümə yaxşı başlayıb. Son turlarda bir qədər xal itkisi ilə üzləşsələr də, inanıram ki, mübarizəyə qoşulacaqlar.
- Belə görünür ki, millinin düşərgəsinə yorğun yollanacaqsınız...
- Şimali İrlandiya ilə oyuna kimi xeyli vaxt var. Həmin vaxta kimi hazır olarıq.
- Azarkeşləri daha bir uğurlu nəticə ilə sevindirə biləcəksiniz?
- Şimali İrlandiya ilə oyun çətin olacaq. Amma ən azından heç-heçəyə ümid etmək olar.
