Qurban Qurbanov: Rəqiblərin xalını saymaq lazım deyil
"Qarabağ"ın baş məşqçisi Qurban Qurbanov Topaz Premyer Liqasının 11-ci turu çərçivəsində "Zirə"yə qarşı keçirdikləri oyundan (2:0) sonra fikirlərini bölüşüb. Azerisport.az xəbər verir ki, o,öncə bunları söyləyib:
"Oyunçularımı təbrik edirəm. Xarakter nümayiş etdirdilər. PAOK-la oyundan sonra bu matça köklənmək çətin idi. Futbolçularımıza çətin olsa da, bacardılar. "Zirə" də məğlubiyyətə layiq deyildi. Amma bizim üçün qələbə qazanmaq vacib idi. Vacib xallar qazandıq".
Qurbanov qazonun vəziyyətindən və əvəzetmələrdən də danışıb: "Bu gün süni örtüklü meydanda oynayırdıq. Amma qazonun vəziyyəti o qədər də pis deyildi. Belə oyunlarda böyük stress olur. Təbii ot örtüyündə oynasaydıq, daha keyfiyyətli oyun sərgiləyərdik. Əvəzetmələrə gəlincə, bəzisi etimadı doğruldur, bəzisi yox. Birinci hissədə top saxlamaqda problemlərimiz var idi. İkinci yarıda isə belə problemimiz olmadı".
"Rəşad Sadıqovun adını bu matçın iştirak ərizəsinə daxil etmək istəmədim. Çünki o, zədədən yenicə özünə gəlib. Bu gün belə bir meydanda onu meydana buraxmaqla riskə yol vermək istəmədik".
Qurbanov lider "Qəbələ"nin xal itkisindən də söz açıb: "Rəqiblərimizin oyunları barədə öz oyunumuz olan gün maraqlanmırıq. Çünki bu, çıxışımıza təsir edə bilər. Bizim üçün əsas öz oyunlarımızdır".
"Qarabağ" beşinci dəfə qalib gəldiyi "Zirə" ilə oyunarda cəmi bir dəfə xal itirib: "Zirə"nin bizim üçün asan rəqib olduğunu demək olmaz. Onlara yalnız iki dəfə asanlıqla qalib gəlmişik. Turnir cədvəlində birinci olmaq istəyiriksə, qələbə qazanmalıyıq. "Zirə" bu gün xoşuma gəldi. Belə oynamağa davam etsələr, mütləq uğurlu nəticələr qazanacaqlar".
"Qarabağ"ın çalışdırıcısı çempionluq uğrunda mübarizədən də danışıb: "Hələ bu barədə danışmaq tezdir. Rəqiblərin xalını saymaq lazım deyil. Düşünmürəm ki, qızıl medallar uğrunda mübarizə "Qəəblə" ilə bizim aramızda olacaq. "Qəbələ"yə Avropa Liqasında uğur qazanmaq üçün məsləhət göstərməyimizə ehtiyac yoxdur. Roman Qriqorçukun məndən də çox təcrübəsi var. Lazım gəlsə, mən ondan məsləhət almağı xahiş edərəm".
