Ruslan Abışov: Hakimin belə səhvləri ucbatından uduzmaq çox üzücüdür
"İnter"in müdafiəçisi Ruslan Abışov Topaz Premyer Liqasının 11-ci turu çərçivəsində "Neftçi"yə qarşı keçirdikləri oyundan (1:2) sonra azerisport.az saytının da suallarını cavablandırıb:
- Bu mövsüm məğlubiyyət tanımayan "İnter" necə oldu ki, tarixinin ən pis günlərini yaşayan "Neftçi"yə uduzdu?
- Çətindi demək. Oyuna elə də yaxşı başlamadıq. Amma sonra özümüzə gəldik, mübarizə apardıq. Daha tez qol vura bilsəydik, hər şey fərqli ola bilərdi.
- Penalti epizodu barədə nə deyə bilərsiniz?
- Oyundan sonra həmin epizoda baxdım. Fikrimcə, hakim səhvə yol verdi. "İnter"in oyunçusu qayda pozuntusuna cərimə meydançasından iki metr aralıda yol verib.
- Bu, narazı qaldığınız yeganə məqamdır?
- Birinci qolda da İmamverdiyev oyundankənar vəziyyətdə idi. Amma bizim 3 xalımızı kim geri qaytaracaq ki? Mövsümün əvvəlindən bəri ilk dəfə deyil ki, qapımıza belə penalti təyin edirlər. "Kəpəz"lə oyunda da heç nədən qapımıza penalti verilmişdi.
- Hakimin qərarını nəticəyə təsir edən səhv sayırsınız?
- 100%. Hakim hər iki qolda kobud səhv edirsə, burada başqa nədən danışmaq olar ki?
- "İnter" matçın sonunda inamlı təsir bağışlasa da, məğlubiyyətdən qaça bilmədiniz...
- Taktiki dəyişikliyə əl atdıq. 4-4-2-yə keçəndən sonra oyunun sonunu hücumda keçirdik. Qolu çox gec vurduq. Əks halda ən azından heç-heçə edə bilərdik. Artıq hər şey geridə qaldı. İndi bunlar barədə danışmaq mənasızdır.
- Oyundan sonra paltardəyişmə otağında böyük səs-küy vardı...
- Uğursuz oyundan sonra futbolçular aqressiv olurlar. Hər şey normaldır. Hakimin belə səhvləri ucbatından uduzmaq çox üzücüdür.
