Araz Abdullayev: İnterə daha böyük hesabla qalib gələ bilərdik
“Neftçi”nin kapitanı Araz Abdullayev Topaz Premyer Liqasının 11-ci turunda “Neftçi” üzərində 2:1 hesablı qələbədən sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Cari mövsümdə məğlubiyyət tanımayan bir komandaya qalib gələcəyinizi gözləyirdiniz?
- Doğma meydanda oynayırdıq, ardıcıl məğlubiyyətlərdən sonra qələbəyə köklənmişdik. Komandamız çox yaxşı mübarizə apardı. Rəqib də güclü oynadı. Biz qələbəni daha çox istəyirdik. “İnter”in də qol epizodları oldu. Lakin biz əlimizə düşən şanslardan daha yaxşı yaralandıq.
- 90 dəqiqə ərzində azarkeşlərin sizi təhqir etdiyini nəzərə alsaq, özünüzü necə hiss etdiniz?
- Fərqi yoxdur, oyuna çıxıramsa, çalışıram komandaya faydalı olum. Belə şeylərə fikir vermirəm. İstərdim ki, gələcəkdə belə şeylər olmasın. İstər-istəməz adama təsir edir.
- Mübahisəli penalti epizoduna baxmısınız? Təkrarda qayda pozuntusunun cərimə meydançasından kənarda baş verdiyi aşkar görünür...
- Xeyr, epizodu izləməmişəm. Penaltidən sonra da imkanlarımız oldu. Onları da vursaydıq, hesab böyük olardı.
- Bilsəydiniz ki, orada penalti yoxdur, topu kənara vurardınız?
- Bir epizodda hakimin bizim lehimizə qayda pozuntusu qeydə aldığını gördük, həmin epizodda Mahir Şükürov topu rəqibə qaytardı. Penalti zamanı da ədalətsiz qərar qəbul olunduğunu bilsəydim, topu kənara vurardım.
- Əvəzlənən zaman kapitan sarğısını niyə Mahir Şükürova verdiniz? Axı, Cavidin vitse-kapitan olduğunu bilirdiniz...
- Çox yorğun idim, yanımda da Mahir vardı. Ona görə verdim, başqa bir şey yoxdur.
- Necə düşünürsünüz, bu qələbə “Neftçi”nin küskün azarkeşlərinin stadiona gəlməsinə kömək edəcək?
- Ümid edirəm. Çalışırıq ki, yaxşı olsun. Bilirsiniz ki, heyətlə bağlı problemlər var. Amma bu heyətlə mümkün qədər çox xal toplamaq istəyirik. Qışda komandamız daha da güclü olacaq.
- Əksər oyunlardan sonra miks-zonaya gəlmirisiniz. Bu, nə ilə bağlıdır?
- Uduzmağı sevmirəm. Sizinlə heç bir problemim yoxdur.
