Mahir Şükürov: Kapitan olmaq istəmirəm
"Neftçi"nin müdafiəçisi Mahir Şükürov Topaz Premyer Liqasının 11-ci turu çərçivəsində "İnter"ə qarşı keçirdikləri oyundan (2:1) sonra azerisport.az saytının da suallarını cavablandırıb:
- Oyun barədə nə deyə bilərsiniz?
- Çətin olacağını bilirdik. "İnter" çempionluğa oynayır. Neçə oyun idi uduzurduq. Rəqibi yaxşı analiz etmişdik. Gördüyünüz kimi, istəyimizə çata bildik.
- Mübahisəli penalti epizodu barədə nə deyə bilərsiniz?
- Mən arxada idim. Öncə elə bildim ki, müdafiəçi ayağa oynayıb, amma sonradan əllə oyun olduğunu anladım. Hakim epizoda yaxın idi. Oyundan sonra lazım olan qərarlar veriləcək. Yəqin ki, heç nədən penalti verməzlər. Bir halda ki, nöqtəni göstərib, deməli, qayda pozuntusu var imiş.
- Kapitanlıq sarğısı sizə təqdim olunanda niyə qəbul etmədiniz?
- Mən kapitan olmaq istəmirəm. Yaxşısı budu sarğını uşaqlar özləri daşısınlar.
- Amma oyun zamanı komandaya göstərişləri siz verirdiniz...
- Komandada ən qocaman, təcrübəli futbolçu mənəm. Artıq karyeramın sonundayam. Amma bu uşaqların karyerası hələ qarşıdadır.
- Beş legioner futbolçunun əvəzedici heyətə göndərilməsi komandaya müsbət təsir edib?
- Baş məşqçi hər şeyi düzgün edir. Qoy öz uşaqlarımız oynasın.
- Uzun fasilədən sonra futbol oynamaq çətin deyil?
- Hər şey yaxşıdır. Bir az artıq çəkim var idi. Amma hiss edirəm ki, artıq həmin çəkini atmışam.
- "Neftçi" qələbə qazanmağa davam edə biləcək?
- Mənim meydana çıxmağım uşaqlar üçün bir stimul oldu. Komandada meydanda danışan futbolçu yox idi. Amma artıq mən buradayam və uşaqlar inamlı oynayırdılar. Bu tempdə davam etməyə çalışacağıq.
