“AFFA Araz Abdullayevə görə heç bir Portuqaliya klubu ilə danışıq aparmır”
Futbol üzrə Azərbaycan yığmasının admistratoru, AFFA-nın seleksiya məsələləri üzrə baş koordinatoru Riad Rəfiyev "Neftçi"nin yarımmüdafiəçisi Araz Abdullayevin qışda Avropa klublarından birinə transfer olunacağı barədə xəbərlərə münasibət bildirib. Azerisport.az saytına açıqlamasında o, bunları söyləyib:
"Arazın Portuqaliya klublarından birinə keçəcəyi barədə məlumat həqiqəti əks etdirmir. AFFA bununla bağlı heç kimlə danışıq aparmayıb. Abdullayevin klubu ilə müqaviləsi var. Öncə öyrənmək lazımdır ki, klub onunla yollarını ayırmağa hazırdırmı. Hələ heç kimlə belə bir danışıq olmayıb. Ona görə də müxtəlif saytların AFFA-nın "Neftçi"nin yarımmüdafiəçisinə klub tapdığına dair yazdığı xəbərlər həqiqəti əks etdirmir. Əlbəttə, hər şey ola bilər, Arazın hansısa Portuqaliya klubuna keçidi də istisna deyil. Amma hazırda bizim tərəfimizdən bununla bağlı heç bir addım atılmayıb. AFFA futbolçularımızın Avropa klublarına keçidinə hər zaman kömək etməyə hazırdır".
