Əfran İsmayılov: PAOK 90 dəqiqə o tempdə oynaya bilməzdi

"Qarabağ"ın yarımmüdafiəçisi Əfran İsmayılov Avropa Liqasının qrup mərhələsinin 4-cü turu çərçivəsində Yunanıstan PAOK-u üzərində qazandıqları səfər qələbəsindən (1:0) sonra aralarında azerisport.az saytının əməkdaşının da olduğu bir qrup jurnalistin suallarını cavablandırıb:

- Oyunla bağlı nə deyə bilərsiniz?
- Çətin oldu. Birinci hissədən sonra yorulacağımızı düşünürdüm. Çünki temp həddən artıq yüksək idi. Oyunu müdafiədən qurub əks-hücumlara bel bağlamışdıq. Şadam ki, istədiyimizə nail olduq, vacib qələbə qazandıq. Artıq bu oyunu unutmağımız lazımdır. Qarşıda daha iki vacib qarşılaşma var. Arxayınlaşmaq olmaz.

- Demək olar ki, bu oyunda erkən qol buraxmamağınız həlledici oldu?
- Bəli. Qurban Qurbanov da bizə bu barədə öz tapşırıqlarını vermişdi, xəbərdarlıq etmişdi ki, ilk dəqiqələrdə rəqibin güclü təzyiqinə davam gətirmək önəmlidir. Bunu bacardıq, ikinci hissədə isə qol vurub, qalib gəldik.

- Baş məşqçiniz fasilədə sizə nə dedi ki, ikinci yarıda komanda daha fəal oynamağa başladı?
- Dedi ki, PAOK yorula bilər. Çünki heç bir komanda 90 dəqiqə o tempdə oynaya bilməz. Elə də oldu. Amma ikinci hissənin də ilk 15 dəqiqəsi asan deyildi.

- Qrupdan çıxmaq şanslarınız barədə indi nə deyə bilərsiniz?
- Vacib qələbə qazandıq. Heç-heçə də bizi qane edəcəkdi. Növbəti oyunlara hazırlaşmalıyıq. Uğurun davamını gətirmək lazımdır.
 
- Qoldan sonra "Qarabağ" bir neçə şansı qaçırdı. Həmin anda rəqibin hesabı bərabərləşdirəcəyindən qorxmadınız?
- Bu barədə düşüncələr olurdu. Amma müdafiə xəttimiz bu oyunda çox yaxşı çıxış etdi.