Riçard Almeyda: Slovana da qalib gəlib, qrupdan çıxmaq istəyirik

“Qarabağ”ın yarımmüdafiəçisi Riçard Almeyda Avropa Liqasının 4-cü turu çərçivəsində səfərdə Yunanıstan PAOK-u üzərində qazanılan qələbədən sonra jurnalistlərin suallarını cavablandırıb. Azerisport.az sizi həmin açıqlamalarla tanış edir:

- Matçdan sonra sizə nə oldu? Nə baş vermişdi?
- Oyundan əvvəl hərarətim var idi. Matçın sonunda artıq özümü pis hiss etməyə başladım. İndi hər şey qaydasındadır.

- Öz oyununuzdan razı qaldınız?
- Bizim komandada fərdi oyunun əhəmiyyəti yoxdur. Əsas komanda halında xarakter göstərmək lazımdır. Biz də PAOK-la matçda buna nail olduq.

- Qrupdan çıxmağa çox yaxın olduğunuzu deyə bilərik?
- Bu oyunda qalib gəldik. Amma qarşıda iki oyun var. Hər şey həmin 2 oyundan asılıdır. İstirahət edib qarşıdakı "Zirə" ilə oyuna hazırlaşmalıyıq.

- Səfərdə qələbəni gözləyirdiz, yoxsa maksimum heç-heçəyə ümid edirdiniz?
- Oyunun nəticəsi ilə bağlı heç bir təxminim yox idi. Amma məşqlərimiz qələbə üzərində köklənmişdi. Əsas məsələ baş məşqçinin tapşırıqlarını dəqiq yerinə yetirmək idi. O, bizdən qələbə tələb edirdi. Biz də onun tapşırdıqlarını düzgün edib, qələbə qazandıq.

- Artıq "Slovan"a qarşı keçirəcəyiniz növbəti oyun hər şeyə aydınlıq gətirə bilər...
- Çexiyada qalib gəlib, pley-offa vəsiqəni təmin etmək istəyirik. Amma indidən bu haqda danışmaq tezdir. Növbəti oyunlarımız da çox çətin olacaq.