Sergey Zenyov: Hakim Poqbanı qovmalı idi
"Qəbələ"nin hücumçusu Sergey Zenyov Avropa Liqasının qrup mərhələsi çərçivəsində Fransa "Sent-Etyen"inə qarşı keçirdikləri oyunu şərh edib. Azerisport.az saytına açıqlamasında o, bunları söyləyib:
"İlk qolu vurmağı bacarsaq da, hissənin sonunda öz qapımızdan top buraxdıq. İkinci hissəyə də yaxşı başladıq. Lakin qol vura bilmədik. Əfsuslar olsun ki, uduzduq. Öz səhvlərimizdən qollar buraxdıq. Mənə elə gəlir ki, Roman Qriqorçukun texniki zonadan kənarlaşdırılması oyunumuza təsir etdi. Hakimliyə gəlincə, bəzi qərarlarını anlaya bilmədim. İspaniyalı hakim elə davranırdı ki, sanki ilk dəfə beynəlxalq matç idarə edirdi. Bir epizodda Poqba məni yıxsa da, hakim həmin epizodda rəqibə qırmızı vərəqə göstərmədi. Halbuki, qapıçı ilə üz-üzə qalacaqdım. Sonuncu ümid folu idi. Qonaqlar azlıqda qalsaydı, matç necə bitəcəkdi, bilmirəm".
