Çudomir Çakarov: Qarabağ buna qadirdir
"Qarabağ"ın sabiq məşqçisi Çudomir Çakarov Avropa Liqasının qrup mərhələsinin 4-cü turu çərçivəsində səfərdə Yunanıstan PAOK-u ilə qarşılaşacaq Ağdam klubunun düşərgəsinə baş çəkib. Azerisport.az saytına açıqlamasında o, Salonikiyə səfəri ilə bağlı bunları söyləyib:
"Yunanıstana ailə vəziyyətimlə əlaqədar gəlmişəm. "Qarabağ"dan getməyimə gəlincə, bunu sağlamlığımla əlaqədar etdim. Amma mən daim komandaylayam. Bu gün müsbət nəticə gözləyirəm. "Qarabağ" buna qadirdir. Ümid edirəm ki, komanda bu mövsüm qrup mərhələsini uğurla keçə biləcək".
Qeyd edək ki, Çakarov 2015-ci ilin yayında xərçəng xəstəliyi ilə əlaqədar "Qarabağ"dan ayrılsa da, xəstəliyə qalib gələrək klubun düşərgəsinə dönmüşdü. Amma bir müddət əvvəl o, yenə Ağdam klubundan ayrılmağa məcbur olub.
