Kristof Qaltye: Bakını qələbə ilə tərk etmək istəyirik

Fransanın "Sent-Etyen" klubunun baş məşqçisi Kristof Qaltye Avropa Liqasının qrup mərhələsinin 4-cü turu çərçivəsində "Qəbələ"yə qarşı səfər oyunu öncəsi fikirlərini bölüşüb. Azerisport.az xəbər verir ki, o, Bakıdakı mətbuat konfransında öncə bunları söyləyib:

- İki il öncə "Qarabağ"la oynayarkən də Bakıda olmuşduq. Həmin oyundan xeyli vaxt keçib. Həmin dövrlə müqayisədə komandam indi daha böyük təcrübəyə malikdir. Müəyyən irəliləyişlər var. Sabah da bu təcrübəmizdən yararlanmağa çalışacağıq. Amma futbolda hər şey mümkündür.

- Avroliqadakı çıxışınızı necə qiymətləndirərdiniz?
- Yaxşı matçlar keçirmşik. "Qəbələ" ilə əvvəlki oyunumuz da maraqlı alındı. Baxmayaraq ki, yeganə qol avtoqol nəticəsində vuruldu. Buna baxmayaraq, biz qələbəyə oynayırdıq.

- Əhvalınızın belə yaxşı olması nə ilə əlaqədardır?
- Bir neçə gün əvvələ kimi əhvalım yaxşı deyildi, amma indi yaxşıdır. Həm də bizi burada çox yaxşı qəbul etdilər. Buna görə hamınıza təşəkkürümü bildirirəm. "Qəbələ"yə qarşı ciddi hazırlaşmışıq. Çətin olacağını bilirik. Amma Bakını qələbə ilə tərk etmək istəyirik.

- "Qəbələ" bu avrokuboklar mövsümündə bütün ev oyunlarında qol vurub. Siz də eyni aqibəti yaşamaqdan qorxmursunuz?
- Biz buraya üç xal üçün gəlmişik. Amma yenə də futbolda hər şeyin baş verdiyini unutmaq lazım deyil. Mümkündür ki, "Qəbələ" qalib gəlsin. Çünki rəqibimiz güclü komandadır. Bu komandanı zəif rəqib saymaq olmaz.