FİFA norveçli futbolçunu Bakıdakı davranışına görə cəzalandırdı
Futbol üzrə Norveç yığmasının yarımmüdafiəçisi Ole-Kristian Selnes DÇ-2018-in seçmə mərhələsi çərçivəsində Azərbaycana qarşı Bakıda keçirilmiş oyunda baş hakimin ünvanına səsləndirdiyi ifadəyə görə FİFA tərəfindən 4 aylıq cəzalanıb. Azerisport.az xəbər verir ki, 11 aylıq cəza ilə yanaşı, ona 5000 İsveçrə frankı (8400 AZN) məbləğində cərimə də kəsilib.
Selnes bu səbəbdən DÇ-2018-in seçmə mərhələsi çərçivəsində Çexiyaya qarşı hər iki oyunu, eləcə də Şimali İrlandiya və Azərbaycanla görüşləri buraxmalı olacaq.
Norveç Futbol Federasiyası artıq bu qərardan FİFA-nın Apelyasiya Komitəsinə şikayət edib. Onlar bu cəzanın həddən artıq ağır olduğunu bildirirlər.
Qeyd edək ki, Selnes bu gün Fransanın "Sent-Etyen" klubunun heyətində yenidən Bakıya gəlir. O, Avropa Liqasının qrup mərhələsi çərçivəsində sabah "Qəbələ"yə qarşı oynaya bilər.
