Yunis Hüseynov: Qəbələnin qrupdan çıxacağına inanmıram

Azərbaycanlı futbol mütəxəssisi Yunis Hüseynov "Qarabağ" və "Qəbələ"nin Avropa Liqasının 4-cü turu çərçivəsində keçirəcəyi oyunlar öncəsi fikirlərini bölüşüb. Azerisport.az saytına açıqlamasında o, bunları söyləyib:

"Qəbələ"nin qrupdan çıxacağına inanmıram. Amma ümid edirəm ki, xal qazana biləcəklər. Nə qədər çox xal qazansalar, bir o qədər yaxşıdır. "Anderlext"lə matçı (1:3) nəzərə almasaq, "Qəbələ" "Maynts" (2:3) və "Sent-Etyen"ə (0:1) qarşı yaxşı mübarizə apardı. Elə Fransada keçirdikləri son oyundan xalla da qayıda bilərdilər. Amma təsadüfi bir qol hər şeyin üstündən xətt çəkdi. Doğma meydanda daha da yaxşı oynayıb, bu rəqibdən xal almaq lazımdır.

"Qarabağ"a gəlincə, PAOK-la səfər oyunu çox vacib əhəmiyyət daşıyır. Amma mənə elə gəlir ki, bu görüşün nəticəsindən asılı olmayaraq, bu qrupdan kimin çıxacağına son turda aydınlıq gələcək. Sadəcə, ağdamlılara öz şanslarını yaxşılaşdırmaq lazımdır. Bakıda qələbə qazana bildilər. İndi bunu Yunanıstanda da təkrarlamağa çalışmalıdırlar".