"Qarabağ bizə qalib gəlmək üçün xeyli güc sərf etdi"
AZAL-ın kapitanı Emin Cəfərquliyev Topaz Premyer Liqasının 10-cu turu çərçivəsində "Qarabağ"a qarşı keçirdikləri oyunu şərh edib. Azerisport.az saytına açıqlamasında o, 0:1 hesablı məğlubiyyətlə bağlı bunları söyləyib:
"Uduzmamaq üçün çox çalışdıq. Meydanın hər qarışı uğrunda mübarizə apardıq. Birinci hissə arzuladığımız kimi keçdi. Rəqibi əks-hücumda yaxalamaq, qol vurmaq istəyirdik. Amma heç cür alınmadı. Həm də unutmayaq ki, rəqibimiz "Qarabağ" idi. Fikrimcə, pis oynamadıq. Ən azından mübarizə apardıq. Ağdamlılar bizə qalib gəlmək üçün xeyli güc sərf etdilər. Bizdə oyun var, mübarizə aparırıq. Sadəcə, xal çatışmır. Ümid edirəm ki, bunu da yoluna qoyacağıq. Öncədən də demişdim ki, heç bir rəqibə güzəştə getməyə hazırlaşmırıq. "Qarabağ"a ilk dövrədə 0:6 hesabıyla uduzmuşduq. Bu dəfə isə daha yaxşı oynadıq. Baş məşqçi Tərlan Əhmədovun rəhbərliyi altında hamımız bu vəziyyətdən çıxmaq üçün çalışırıq".
