Muarem Muarem: Həmin anda sadəcə, topa baxırdım

"Qarabağ"ın yarımmüdafiəçisi Muarem Muarem Topaz Premyer Liqasının 10-cu turu çərçivəsində AZAL-a qarşı keçirdikləri oyundan sonra jurnalistlərin suallarını cavablandırıb. Azerisport.az xəbər verir ki, o, 1:0 hesabıyla qalib gəldikləri görüşü belə şərh edib:

- Çətin oyun olacağını bilirdik. AZAL bizə qarşı çox aqressiv oynadı. Matçın əvvəlində daha çox çətinliklə üzləşdik. Bu da daha çox qazonun vəziyyətinə görə idi. Amma buna baxmayaraq, üç xal qazana və yolumuza davam edə bildik.

- Süni örtüklü qazonda oynamaq nə dərəcədə çətindir?
- Belə meydanda oynamaq bizə çox çətindir. Çünki "AZAL Arena"nın qazonu ilə digər stadionların örtüyü arasında çox fərq var. Çox pis qazondur. Burada oynadıqdan sonra ayaqlarımız ağrıyır. Amma bütün bunlara hazır idik. Qoldan sonra daha bir neçə şansımız oldu. Sadəcə, onlardan yararlana bilmədik.

- Qol vurduğunuz epizodda tribunadan ofsaydda olduğunuz hiss olunurdu. Amma videotəkrara baxanda ofsayd olmadığı dəqiqləşdi...
- Bu barədə heç nə deyə bilmərəm. Mən həmin an sadəcə, topa baxırdım, digər oyunçulara diqqət etmirdim.

- "Qarabağ"ın sıx qrafiklə oynaması sizi yormur?
- Əlbəttə, yorğunluq var. Amma baş məşqçi bizi mümkün qədər yaxşı hazırlaşdırmağa çalışır. O, kiməsə istirahət verir, kimisə oynadır. Qarşıda da vacib oyunlarımız var.

- Bu yorğunluq Avropa Liqası çərçivəsində Yunanıstan PAOK-u ilə görüşdə komandanıza mənfi təsir göstərməyəcək?
- Bu oyuna hələ bir neçə gün qalır. İstirahət üçün də vaxtımız olacaq. Yeri gəlmişkən, PAOK-la matç bizim üçün çox vacibdir. Yaxşı hazırlaşmağa və səfərdən müsbət nəticə ilə qayıtmağa çalışacağıq.