Rahid Əmirquliyev: Əsas heyətdə oynamağı hər kəs istəyir
"Qarabağ"ın yarımmüdafiəçisi Rahid Əmirquliyev Topaz Premyer Liqasının 10-cu turu çərçivəsində AZAL-a qarşı keçirəcəkləri oyun öncəsi azerisport.az saytının suallarını cavablandırıb:
- Qarşıdakı oyundan nə gözləyirsiniz?
- AZAL sonuncu pillədə qərarlaşsa da, bizi ağır oyun gözləyir. Çünki onlar son dövrlər yaxşı oyun sərgiləyirlər. Həm də doğma meydanda inamlı təsir bağışlayırlar.
- "Neftçi" "Qəbələ"yə qalib gəlsə, sizin üçün zirvəni ələ keçirmək şansı yarana bilər...
- Bizə ancaq öz oyunumuz maraqlıdır. AZAL üzərində qələbə qazanmaq istəyirik.
- Son turda "Neftçi"yə qarşı keçirdiyiniz oyunda (2:0) daha çox rəqib futbolçu Katalin Tiranın meydançaya çıxan azarkeşə qarşı davranışı səs-küyə səbəb oldu...
- Futbolda belə hallar olur. Deyərdim ki, Tira azarkeşə qarşı doğru davranmadı. Heç bir azarkeşə əl qaldırmaq olmaz. Onun rəqib və ya öz klubunun azarkeşi olmasının da fərqi yoxdur. Çünki futbolu məhz azarkeşlər gözəlləşdirir.
- Son oyunlarda PAOK-a, "Neftçi"yə qol vurduğunuzu nəzərə alsaq, yəqin ki, uğurlu seriyanı davam etdirmək istəyirsiniz?
- Həmişə komandama kömək etməyə, qol vurmağa çalışıram. Amma qolu kimin vurmasının ciddi fərqi yoxdur. Əsas komandanın uğur qazanmasıdır.
- Amma vurduğunuz hər qol sizin əsas heyətdə möhkəmlənməyinizə də kömək edir...
- Əsas heyətdə oynamağı hər kəs istəyir. Buna həm məşqlərdə, həm də oyunlarda nail olmağa çalışıram. Mənim mövqeyimdə başqa güclü futbolçularımız çoxdur. Hər kəs start heyətdə meydana çıxmağa layiqdir. Amma qərarı məşqçilər verirlər. Kim yaxşı vəziyyətdə olursa, o da oynayır.
- AZAL-la oyundan sonra sizi Yunanıstanda PAOK-la növbəti matç gözləyir. Bakıdakı qələbəni səfərdə də təkrarlaya biləcəksiniz?
- PAOK yaxşı komandadır. Onlar öz azarkeşləri qarşısında daha yaxşı oynayacaqlar. Bizə ağır olacaq. Amma biz əlimizdən gələni edəcəyik ki, səfərdən də uğurlu nəticə ilə qayıdaq.
