Jonas Pessalli: Neftçi üçün hər oyun finala bərabərdir

"Neftçi"nin hücumçusu Jonas Pessalli Topaz Premyer Liqasının 9-cu turu çərçivəsində "Qarabağ"a qarşı keçirdikləri oyundan (0:2) sonra azerisport.az saytının suallarını cavablandırıb. Azerisport.az sizi həmin müsahibə ilə tanış edir:

- Yeni komandanızla ikinci oyununuzda da məğlubiyyətlə üzləşdiniz. Matçla bağlı fikirləriniz necədir?
- Uduzmaq istəmirdik. Amma yenə alınmadı. Daha çox məşq etmək, növbəti oyunda bundan da yaxşı oynamaq lazımdır. Bu vəziyyətdən çıxmağın vaxtı çatıb.

- Xəbəriniz var ki, komandanızın "Qarabağ"la oyunları "Azərbaycan derbi"si adlandırılır? Siz bu atmosferi hiss edə bildiniz?
- Bu barədə məlumatım var idi. Qələbə qazanmağı çox istəyirdik. Amma təəssüf ki, yenə uduzduq.

- Buraya gələndə belə bir komandaya düşəcəyinizi gözləyirdiniz?
- Azərbaycana gələrkən "Neftçi" ilə maraqlanmışdım. Klubun hansı durumda olmasını bilirdim. Mən də buraya komandanı bu vəziyyətdən çıxarmağa kömək etmək üçün gəlmişəm. Amma hələ nəticə yoxdur.

- Matçın son dəqiqələrində Katalin Tira ilə azarkeş arasında baş verən hadisəyə münasibətiniz necədir? Siz də onun yerində olsaydınız, azarkeşə vurardınız?
- Kənardan danışmaq asandır. Yəqin ki, belə etməzdim. Amma həmin anı şərh etmək üçün futbolçunun yerində olmaq lazımdır. İndi onu deyə bilərəm ki, fanatı vurmaqdan yayınardım.

- Azarkeşə əl qaldıran futbolçunu peşəkar adlandırmaq olar?
- Deyə bilmərəm. Mən hələ komandaya tam alışmamışam. Cəmi iki həftədir buradayam. Bu cür sualları uzun müddətdir komandada olan futbolçulara ünvanlamaq lazımdır.

- Qarşıda sizi "Qəbələ" ilə oyun gözləyir...
- Bizim üçün hər bir oyun finala bərabərdir. Bu oyuna da ciddi hazırlaşacağıq. Bizi çətin oyun gözlədiyini bilirik.