Robert Prosineçki: Qrupdan çıxmaq üçün bizdən asılı olan hər şeyi edəcəyik
Futbol üzrə Azərbaycan yığmasının baş məşqçisi Robert Prosineçki komandamızın çıxışı barədə növbəti açıqlamalar verib. Azerisport.az xəbər verir ki, xorvatiyalı mütəxəssis öncə bunları söyləyib:
"Seçmə mərhələyə uğurlu başlamışıq. İndi hər birimiz bu nağılın davamını gətirmək istəyirik. Mən çox böyük optimistəm. Fikrimcə, nəyəsə nail ola bilərik. Ən azından bu nağıl bir ay davam edə bilər. Amma əldə etdiyimiz uğurlarla da kifayətlənmək istəmirik. Futbolçularımız artıq öz güclərinə tam inanırlar".
Prosineçki millimizin DÇ-2018-in seçmə mərhələsi çərçivəsində qrupdan çıxmaq şansları barədə də söz açıb: "Biz ən yaxşısına ümid edirik. Maksimuma nail olmaq istəyirik. Bunun üçün özümüzdən asılı olan nə varsa, edəcəyik".
Xorvatiyalı mütəxəssis bildirib ki, millinin son uğurlarına görə hazırda hamı futboldan danışıb: "Bunu şəhərdə də hiss etmək olur. Bir az eyforiya yaranıb. Hansı ki, bu, bəzən yaxşı, bəzən də pis təsir göstərir. İstərdim ki, gələcəkdə bizimlə oynayacaq komandalar desinlər ki, "Ey, Azərbaycan gəlir!" Rəqiblərimizin bizə asan xal qazanacaqları rəqib gözü ilə baxmasını unutdurmaq istəyirik".
"Azərbaycanı futbol ölkəsi saymaq olmaz. Amma burada idmanın inkişafı üçün çoxlu vəsait yatırılır. Boks, ağır atletika, güləş daha populyar idman növləridir. Olimpiadalarda da medalları əsasən belə idman növlərində əldə edirər".
"Azərbaycan çempionatında 2-3 güclü komanda var. Milli üzvlərinin də əksəriyyəti məhz bu klublarda çıxış edirlər. Bir neçə milli üzvü də Azərbaycandan kənarda oynayır".
Prosineçki Azərbaycan paytaxtındakı həyatından da danışıb: "Bakı fenomenal şəhərdir. Burada daim yeni nələrsə tikilir. Həyat təhlükəsizdir. Cinayət halları çox az baş verir. Yaxşı məktəblər, xorvatiyalıların cəmiyyəti var. Peşəkar baxımdan da çalışmaq üçün hər cür şərait var. Toplanışlar üçün əla meydançalarımız, stadionumuz, infrastrukturumuz var".
(HINA)
