Qurban Qurbanov: Neftçi belə davam etsə, yaxşı olacaq

"Qarabağ"ın baş məşqçisi Qurban Qurbanov Azərbaycan Premyer Liqasının 9-cu turu çərçivəsində "Neftçi"yə qarşı keçirdikləri oyunu şərh edib. Azerisport.az xəbər verir ki, Ağdam klubunun çalışdırıcısı 2:0 hesabıyla bitən qarşılaşmadan sonra bunları söyləyib:

"Komandamdan razı qaldım. 90 dəqiqə intizamlı oyun sərgiləməyi bacardıq. 2:0 hesabı ilə qalib gəlsək də, elə də çox qol şansımızın olduğunu deməzdim. "Neftçi"nin ikinci hissədə daha çox pressinq edəcəyini, irəli çıxacağını düşünürdüm ki, bu da bizim üçün yaxşı olardı. Amma onlar öz oyun sxemlərini saxladılar. Bu da bizə çətinlik yaşatdı. Bütövlükdə, hər iki komandanın layiqli oyun sərgilədiyini düşünürəm. Uşaqları təbrik edirəm. Onlar bu cür istəkli oynamaları məni sevindirdi".

Qurbanov matçın sonunda rəqib komandanın futbolçusu Katalin Tira ilə meydana daxil olmuş azarkeş arasında baş verən olaya da münasibət bildirib: "Bu, xoşagəlməz epizoddur. Amma futbolda belə hallar olur. Uğursuz nəticələri nəzərə alsaq, "Neftçi" azarkeşini də başa düşmək olar. Fikrimcə, klub rəhbərliyi və məşqçilər korpusu vəziyyəti düzəltmək üçün çalışacaqlar. İnkişaf hiss olunur. Belə davam etsələr, hər şey yaxşı olacaq". (CBC)