Fəhmin Muradbəyli: Qarabağ məğlubedilməz komanda deyil
"Neftçi"nin yarımmüdafiəçisi Fəhmin Muradbəyli Topaz Premyer Liqasının 9-cu turu çərçivəsində "Qarabağ"a qarşı keçirəcəkləri oyun öncəsi azerisport.az saytının suallarını cavablandırıb:
- "Qarabağ"la oyuna hazırlıq necə gedir?
- Komandada ab-hava yaxşıdır. Motivasiyamız yüksəkdir. Bütün həftəni bu oyun üçün məşq etmişik.
- Elxan Abdullayevin rəhbərliyi altında ilk qələbənizi "Kəpəz" üzərində qazandınız. Hər kəs sizdən bu uğurun davamını gözlədiyi halda, "Zirə" ilə görüşdə yenə məğlub oldunuz. "Neftçi"də indi vəziyyət necədir?
- "Zirə" ilə qarşılaşmanı (0:2) nəzərə almasaq, Abdullayevin gəlişindən sonra oyunumuz yaxşılaşıb. Zirəlilərlə görüşdə isə oyunumuz qətiyyən alınmadı. Nəticə olmasa da, oyun var. Zamanla hər şey daha yaxşı olacaq. Bizdə yeni futbolçular var ki, onlara zaman lazımdır. Elə məşqçilərimiz də təzədir.
- Amma hətta yaxşılaşmış bu oyununuzla da çətin ki, "Qarabağ"a nəsə edə biləsiniz...
- Belə deməzdim. "Qarabağ" məğlubedilməz komanda deyil. Ötən mövsüm də bizim işlər pis getdiyi halda onlara qalib gəlib, heç etmişdik.
- Bu oyunu "Bakcell Arena"da keçirəcəksiniz. Bu, sizin üçün nə dərəcədə önəmlidir?
- Bunun fərqi yoxdur. Qələbə qazanmaq, xallarımızın sayını artırmaq istəyirik. Qarşıda bizi "Qəbələ" və "İnter"lə oyunlar gözləyir. Odur ki, hər oyundan xalla ayrılmağımız vacibdir.
- Mümkün məğlubiyyət isə sizi sonuncu pilləyə sala bilər. Futbolçular bunu başa düşürlər?
- Nə qədər ki, bu, baş verməyib, vəziyyəti düzəltməyə çalışmalıyıq. Bunu heç təsəvvür belə etmək istəmirəm.
- Rəhbərlik komandanın uğursuz çıxış barədə nə deyır? Ola bilər ki, komanda üzvlərinə cərimə tətbiq olunsun?
- Rəhbərlik bizimlə tez-tez görüşür. Hər dəfə bizə inandıqlarını söyləyirlər. Cəriməyə gəlincə, bu mövsüm hələ olmayıb. Ötən mövsüm isə səhv etmirəmsə, bir dəfə tətbiq olunmuşdu. Ola bilsin ki, hələ yeni baş məşqçinin uyğunlaşma prosesi getdiyi üçün heç bir cərimə tətbiq olunmur.
- Artıq 20 yaşınız olsa da, "Neftçi"də əsas heyət üzvünə çevrilmisiniz. Amma çıxış etdiyiniz komanda ən pis günlərini yaşayır...
- Mən "Neftçi"nin ən yaxşı mövsümlərində də komandada olmuşam. Sadəcə, Böyükağa Hacıyev mənə şans vermirdi. Çünki heyətdə Flavinyo və Voyay kimi oyunçular var idi. Amma bu, son deyil. Həmişə belə olacağını düşünmürəm. "Neftçi" də əvvəlki günlərini qaytaracaq və ümid edirəm ki, mən də komandada olacağam.
