Kaka: Arazın Dördlər finalına çıxmaq üçün yaxşı şansı var

Futzal üzrə UEFA Kubokunun elit raundunda Azərbaycan çempionu "Araz"la bir qrupa düşən Rusiyanın "Qazprom-Yuqra" klubunun baş məşqçisi Kakanın azerisport.az saytına müsahibəsi:

- Püşkatmanın nəticəsindən razı qaldınız?
- Fikrimcə, çox çətin qrupa düşmüşük. Üç rəqibimizdən yalnız biri tanınmış deyil (Almaniyanın "Hamburq" klubunu nəzərdə tutur - red.). Xorvatiya "Nasional"ı qrup oyunlarının ev sahibi kimi çox güclüdür. "Araz" böyük təcrübəyə malik komandadır. Bu klubun bir neçə oyunçusu son dünya çempionatında Azərbaycan yığmasının heyətində çıxış edirdi. Odur ki, elit mərhələdə işimizin asan olmayacağı dəqiqdir.

- Amma əksəriyyət qrupun favoriti kimi sizin komandanın adını çəkir...
- Bu cür fikirlər mənim üçün təəccüblü deyil. Çünki biz son çempionuq. Amma mən bu barədə düşünmürəm. Məsələn, ötən il biz də son çempion "Kayrat"la bir qrupda yr almışdıq. Amma onları məğlub etməyi bacardıq.

- Bəs "Araz"ın şanslarını necə qiymətləndirərdiniz?
- Təbii ki, qrupdakı hər bir komanda kimi, "Araz"ın da uğur qazanmaq şansı var. "Araz"ı tək mən yox, hamımız yaxşı tanıyırıq. Yenə də milli ilə Kolumbiyadakı DÇ-də iştirak edən uşaqların böyük təcrübəyə malik olduğunu qeyd etmək istərdim. Odur ki, qrupdan çıxmaq şansları yaxşıdır. "Araz" məhz bu DÇ-dən sonra daha da güclü oldu. Həm də komandanın güclü məşqçilər korpusu var.

- Dördlər finalına çıxa bilməsəniz, bu, böyük uğursuzluq sayıla bilərmi?
- Düşünmürəm ki, belə bir hal yaşansa, bunu faciə hesab etməliyik.

- Niyə də yox?
- Çünki bizi qrupdan çıxmaq üçün ciddi rəqiblərlə mübarizə gözləyir. Həm də hər qrupdan cəmi bir komanda mərhələ adlayacaq. Aydın məsələdir ki, qrupdan çıxa bilməsək, bunu yaxşı nəticə saymaq olmaz. Amma faciə də olmayacaq.