Ansi Aqolli: PAOK-la matç bizim üçün finala bərabər idi

"Qarabağ"ın müdafiəçisi Ansi Aqolli Avropa Liqasının qrup mərhələsi çərçivəsində Yunanıstan PAOK-u üzərində qazandıqları qələbəni şərh edib. Azerisport.az xəbər verir ki, o, 2:0 hesablı qələbə ilə bağlı öncə bunları söyləyib:

"Çox çətin oyun oldu. PAOK güclü komandadır. Belə rəqibə qalib gəldiyimiz, 3 xal qazandığımız üçün razıyıq. Artıq bu uğuru iki həftə sonra Yunanıstanda da təkrarlamaq barədə düşünürük".

Onun sözlərinə görə, "Qarabağ" bu oyuna çox ciddi yanaşdığına görə uğur qazandı: "Biz çox yaxşı oynadıq. Meydana yaxşı motivasiya ilə çıxmışdıq. Çünki bu qələbə bizə çox lazım idi. Bizim üçün finala bərabər oyun idi. Buna görə də üç xal qazanmağı bacardıq".

Aqolli rəqib barədə də danışıb: "Buraxılan qoldan sonra yunanlar hesabı bərabərləşdirmək üçün irəli atıldılar. Belədə onlar müdafiədə boşluqlar buraxmağa başladılar. Biz də bundan yararlanıb ikinci qolu vurduq. "Qarabağ" güclü rəqibə qarşı yaxşı oynadı".

Ansi səfər matçının çətin keçəcəyini vurğulayıb: "Səfərdəki oyun bizim üçün çox çətin olacaq. Rəqibimiz Bakıdakı oyunda da özünü yaxşı tərəfdən göstərməyi bacardı. Salonikidə də ağır matç olacağını düşünürəm. Bizim üçün qrup mərhələsindəki bütün oyunlarımız çətin və vacibdir. Hər bir oyun həlledici əhəmiyyət daşıyır. Amma ilk növbədə bizə qarşıdakı çempionat oyununa köklənmək lazımdır. PAOK-la növbəti matç barədə "Neftçi" ilə görüşdən sonra düşünmək olar".